«ՀՀ ոստիկանությունը նախատեսում է վարորդական իրավունքի վկայականի համար կիրառել բալային զսպող համակարգ: Այս թեմայի շուրջ «ժողովուրդ» օրաթերթը զրուցել է «Վարորդի ընկեր» հասարակական կազմակերպության համահիմնադիր Սերգեյ Ղահրամանյանի հետ:
-Պարո´ն Ղահրամանյան, ի՞նչ է իրենից ներկայացնում բալային համակարգը և դրա ներդրման արդյունքում ինչ դրական փոփոխություններ են սպասվում:
-Վերջին տարիներին ՃՏՊ-ների դեպքերի աճն է, որոնք, այսպես ասած, հիմք են հանդիսացել այս նախաձեռնության համար, որովհետև դրանց հետևանքով զոհերի և վիրավորների թիվը ճանապարհներին գնալով շատանում է: Այս տարեսկզբից մինչև սեպտեմբերն ընկած ժամանակահատվածում արդեն 245 զոհ ենք ունեցել ճանապարհատրանսպորտային պատահարների արդյունքում, այն դեպքում, երբ 2016 թվականին, ընդհանուր առմամբ, զոհերի թիվը կազմում էր 26, իսկ 2017-ին՝279: Այս տարվա վերջին դեռ 2 ամիս կա, բայց թվերն արդեն իսկ խոսուն են, ինչը ցավալի է:
Այս բալային համակարգով զգալի կթեթևանա ֆինանսական բեռը, քանի որ տուգանքներ կան, որոնք մի քանի տասնյակ անգամներ նվազում են. ընդհուպ մինչև 300 հազար դրամի տուգանքները կիջեցվեն մինչև 29 հազար դրամ: Բայց դրանից պատասխանատվությունը չի նվազում, փոխարենը կկիրառվի բալային համակարգը:
Վարորդներին վարորդական վկայական ձեռք բերելուց հետո կտրամադրվի 9 միավոր 12 ամսվա համար: Մոտավոր թվեր եմ ասում, բայց 0-5 խախտում իրականացնում են վարորդների 74 տոկոսը, իսկ 26 տոկոսը՝ 5-ից ավելի բարձր, այդ թվում 0.6 տոկոսի մեջ մտնում են 50 անգամ և ավելի խախտում իրականացնողերը, որոնք տարվա ընթացքում 300-500 խախտում են իրականացնում:
Հիմնականում շեշտը դրվել է վտանգավորության աստիճան ունեցող խախտումների վրա՝ ոչ սթափ, բարձր արագություն, հանդիպակաց, կարմիր լույս, նաև հետիոտնային անցման վրա կայանելու դեպքում: Ընդ որում, մոտ 100 տեսակի տուգանքներից միայն 16-ի վրա է ազդելու բալային համակարգը»,-գրում է թերթը:
Նյութն ամբողջությամբ կարդացեք թերթի այսօրվա համարում:
