Armenpress.am-ը գրում է.
Ֆրանսիայի Հանրապետության արտաքին քաղաքականության կենտրոնում է գտնվում մշակույթը, որը Եվրամիության որդեգրած քաղաքականության հիմնարար ուղղություններից մեկն է: Ինչպես տեղեկացնում է «Արմենպրես»-ը, այս մասին լրագրողների հետ զրույցում նշեց Հայաստանում Ֆրանսիայի դեսպան Ժոնաթան Լաքոտը:
«Այս առումով կարևոր է, որպեսզի Եվրամիություն-Հայաստան հարաբերությունները զարգանան՝ միտված լինելով դեպի մշակույթ: Հայաստանը մաս է կազմում եվրոպական մեծ այդ ընտանիքի, իսկ Եվրամիության անդամ պետությունները Հայաստանում շատ դինամիկ գործունեություն են վարում: Բոլորն էլ փաստում են, որ գործ ունեն հիանալի հանրության հետ: Հայաստանը հինավուրց պատմություն ունեցող երկիր է, շատ կիրթ ազգաբնակչությամբ: Այս առումով ստացվում է այնպես, որ եվրոպական մնացյալ դրսևորումների նկատմամբ հանրությունը մեծ ընկալունակություն է դրսևորում»,- ընդգծեց Լաքոտը: