Հերոսական անպարտելի ոգի, դյուցազունների սխրանքներ և հայ ժողովրդի՝ իր ոսոխների դեմ մղած դարավոր պայքար. Գաբրիել Սունդուկյանի անվան ազգային ակադեմիական թատրոնի բեմում երեկ պրեմիերա էր: «Սասնա ծռեր» էպոսը ներկայացման տեսքով հանդիսատեսին մատուցվեց նոր ու ժամանակակից լուծումներով։ BlogNews.am-ը ևս ներկա է եղել ներկայացման առաջնախաղին, ֆիքսել հետաքրքիր դրվագները կուլիսներից ներս ու բեմում:
Ներկայացման մեկնարկին րոպեներ են մնացել, հետնաբեմում լարված ու էմոցիոնալ մթնոլորտ է: Դերասաններից ավելի անհանգիստ երիտասարդ ռեժիսոր Սամսոն Մովսեսյանն է, ով էլ ստանձնել է մեծ պատասխանատվություն՝ բեմադրելով ազգային էպոսը. «Փորձել ենք օգտագործել ժամանակակից թատրոնի լեզուն, որը չի ենթադրում միայն տեխնիկական միջոցներ, այլև դերասանական հետաքրքիր կատարումները, սինթեզն արվեստի տարբեր տեսակների հետ: Էպոսի չորս մասերն էլ ներառված են, բայց ընտրել ենք առավել հետաքրքիր հատվածները: Բեմում հնչելու է կենդանի երաժշտություն, դերասանները երգում են, նվագում, պարում: Կլինեն դերասաններ, ովքեր, կերպարանափոխվելով, մի քանի դերում հանդես կգան»,- նշում է ռեժիսորն ու շտապում վերջին ցուցումները տալ մեկնարկից առաջ:
«Սասնա ծռեր» բեմադրության համար հետաքրքիր թիմ է հավաքվել: Այլ թատրոններից հրավիրվել են դերասանուհիներ Լիլի Էլբակյանը և Սոնա Մաթևոսյանը: Սասունցի Դավթին մարմնավորում է Խորեն Լևոնյանը, ով ի դեպ, տարեվերջին Արմեն Էլբակյանի առաջարկով համալրեց սունդուկյանցիների դերասանական ընտանիքը: «Սասնա ծռեր»-ով Խորենը նշելու է իր նորամուտը թատրոնում: Ներկայացման մեջ ընդգրկվել են նաև Մայր թատրոնի հիմնականում երիտասարդ դերասանները, որոնք փորձելու են նոր մոտեցումներով ներկայացնել «Սասնա ծռերը»:
Դերասանուհի Արաքսյա Ամիրխանյանն, օրինակ, մարմնավորում է արաբ թագուհի Իսմիլ խաթունին: Առաջին հայացքից հակասական կերպար է, որը, սակայն, դերասանուհին այդպիսին չի ընկալում. «Ինձ համար, օրինակ, նրա բոլոր քայլերն արդարացված են: Խոհեմ, խելացի, նպատակասլաց, իր երկրի ու ազգի մասին մտածող կին է նա: Վատ չէր լինի, եթե հարկ եղած դեպքում հայ կանայք մի քիչ նմանվեին Իսմիլ խաթունին: Իհարկե, որոշ ընդվզումներ, այդուհանդերձ, ունեմ կերպարիս հետ կապված: Պետք է ասեմ, որ հիանալի թիմ է հավաքված, առանց ինտրիգների, առանց ավելորդ հպարտության, մենք շատ ենք աշխատել, որպեսզի նոր ներկայացմամբ թատրոնը մեկ այլ մակարդակի կարողանանք բարձրացնել»:
Բեմադրությունը երկու գործողությամբ է՝ նախատեսված 12 և բարձր տարիքի հանդիսատեսի համար: Ռեժիսորը խոստովանում է՝ ազգային էպոսը բեմադրելն իրեն չի վախեցրել. «Կարծում եմ`«Սասնա ծռերը» կլինի բազմագույն, բազմաշերտ գործ, որը դուր կգա մարդկանց ու հանդիսատեսին կբերի թատրոն: Սպասումները մեծ են, վստահ եմ՝ ներկայացումը կկառուցի դիալոգ դահլիճի հետ, որպեսզի այն ապրի: Մենք որքան էլ նախօրոք կանխատեսումներ անենք, ռիսկերը հաշվարկենք, ամեն ինչ պարզ է դառնում միայն բեմի վարագույրները փակվելուց հետո»:
Ներկայացման մեջ կան շերտեր, որոնք կզարմացնեն հանդիսատեսին. միայն Դավթի և Մելիքի հանրահայտ և տպավորիչ մենամարտը չէ, որ կներկայացվի, կարտացոլվեն մարդկային հարաբերություններ, ազգային մտածողության հատկանիշներ, որոնք գուցե մոռացության են մատնվել: Ռեժիսորը համոզված է՝ թեման առավել քան արդիական է մեր օրերում:
Անդրադառնալով էպոսի բեմադրության լեզվին՝ բեմադրիչն ասաց, որ մաքսիմալ փորձել են չվնասել այն, բայց ամեն դեպքում որոշ բառերի համար փորձել են գտնել հոմանիշներ, որն այսօրվա հանդիսատեսի համար հասկանալի լինի։
Նյութը՝ Էմմա Վարդանյանի
