Yerkir.am-ը գրում է.
ԱԺ պետաիրավական հանձնաժողովի նախագահ, նախկին գլխավոր դատախազ Գևորգ Կոստանյանն այսօր խորհրդարանում լրագրողների հետ զրույցում անդրադարձավ վարչապետ Նիկոլ Փաշինյանի` սահմանադրական փոփոխություններ նախաձեռնելու հայտարարությանը:
Փաշինյանը մտավախություն ունի, որ ՀՀԿ-ն վարչապետի հրաժարականից հետո կգնա նոր վարչապետի ընտրությունների, ուստի ցանկանում է նախաձեռնել սահմանադրական փոփոխություններ, որպեսզի ԱԺ-ն ինքնալուծարվի:
Կոստանյանը նախ նշեց, որ ՀՀԿ խմբակցությունը դեռ քաղաքական հայտարարություն չի տարածել, որ խուսափում է առաջիկա արտահերթ խորհրդարանական ընտրություններից, ապա հավելեց, որ խորհրդարանն այսօր ունի առաջնային մանդատ:
«Ինչ վերաբերում է ինքնալուծարմանը, պետք է ասեմ, որ խորհրդարանն այսօր ունի առաջնային մանդատ, այսինքն` ընտրվում է ժողովրդի կողմից: Հետևաբար` խորհրդարանն ունի պաշտպանվածության որոշակի մակարդակներ՝ ըստ սահմանադրական իրավունքի: Պառլամենտները, որպես կանոն, գնում են ցրման անգործունակության պատճառով: Այսինքն՝ պառալամենտը ունակ չէ կատարել իր ֆունկցիաները»,- ասաց Կոստանյանը:
Նա հրաժարվեց խորհրդարանն ինքնալուծարելու քաղաքական գնահատականները մեկնաբանել, նաև նշեց, որ իրավական հիմքերի կողմնակիցն է:
