Ֆոլկ երաժշտության հնչյունները երեկ գրավել էին «Մոսկվա» կինոթատրոնի ամառային դահլիճը: Համերգային ծրագիրը Թումոյի այս ամառվա գլխավոր մշակութային միջոցառումների շարքում էր իրականացվում: Ֆոլկ SKA ռիթմերի սիրահարների համար ելույթ ունեցան Alexandrapol Orchestra-ն և Aratta Band-ը:
Ինչպես կազմակերպիչները նշեցին, միջոցառումների այս շարքը շարունակվելու է մինչև հուլիսի վերջ, շաբաթը երեք անգամ լինելու են համերգներ, ներկայացումներ, կինոդիտումներ:
Համերգային ծրագիրը բացեց Alexandrapol Orchestra-ն, որն իր էներգետիկ հնչյուններով ցրեց ամառվա տապն ու զովացրեց մարդկանց, այնուհետև ուրախ տրամադրությունը շարունակեց Aratta Band-ը:
Aratta Band–ը հիմնադրվել է 2013 թվականին, բայց 2016 թվականին խմբի կազմում փոփոխություններ են եղել: Ինչպես նշում է խմբի կիթառահար Տարոնը, նրանք ներկայանում են երաժշտական տարբեր ժանրերում, բայց հիմնական ուղղվածությունը ֆոլկն է. «Թումոյի կազմակերպիչները կապ հաստատեցին մեզ հետ և ցանկություն հայտնեցին, որ մենք էլ նվագենք: Մենք էլ այդ փաստից, իհարկե, շատ ուրախացանք: Թումոյի կազմակերպած միջոցառումերը միշտ շատ բարձր մակարդակի են լինում: Միշտ փորձում ենք աշխատել նրանց հետ, քանի որ Թումոն լավագույն կազմակերպություններից է»:
Խումբը միջոցառման ժամանակ նվագեց և ներկայացրեց այնպիսի երգեր, որոնք նորություն էին: Հիմնական երգացանկը ներկայացրին սկզբում, որից հետո հնչեցին նոր ստեղծագործությունները:
