Հայաստանի սննդամթերքի անվտանգության տեսչական մարմնի աշխատակազմի ղեկավար Արմեն Միրզոյանը, ով երկար տարիներ պետական պաշտոններ է զբաղեցրել, հասցրել է այդ ընթացքում բավականին լուրջ ունեցվածք կուտակել: «Ժողովուրդ» օրաթերթը նրա ներկայացրած պաշտոնական հայտարարագրից տեղեկացավ, որ նրա դրամական միջոցները կազմում են 75 մլն դրամ, 330 հազար դոլար և 18 հազար եվրո: Իսկ որպես եկամուտ նա հայտարարագրել է իր աշխատավարձը, որն անցած տարում ամսական կազմել է մոտ 508 հազար դրամ:
Նշենք, որ պաշտոնը ստանձնելու հայտարարագրում նշված է, որ Միրզոյանն ունի մեկ բնակարան: Նրա տիկնոջ՝ Հասմիկ Բադալյանի դրամական միջոցներն ավելին են՝ 15 մլն դրամ, 9 մլն դոլար, 7000 եվրո և 250 հազար ռուսական ռուբլի: Որպես եկամուտ պաշտոնյայի կինը հայտարարագրել է տրված փոխառությունների դիմաց ստացված տոկոսը՝ 2 հազար դոլարի չափով և ամսական 16 հազար դրամ կենսաթոշակը:
Թե ինչպես է հաջողացրել Արմեն Միրզոյանն այսքան դրամական միջոց կուտակել, բնականաբար, պաշտոնական հայտարարագրում ոչինչ չկա նշված: Բայց Արմեն Միրզոյանի կենսագրական տվալներին ծանոթանալիս պարզ է դառնում, որ նա, դեռևս 2003 թվականից սկսած, պետական պաշտոն է զբաղեցրել, և այդ պաշտոններն էլ հավանաբար օգնել են հարստանալու: Նա այդ տարում սկսել է ՀՀ ԿԱ հարկային պետական ծառայության վերահսկողության վարչության տեսչական բաժնի գլխավոր հարկային տեսուչից, 2006-2007 թվականներին եղել է Չարենցավանի, իսկ 2007-2009-ին՝ Դավիթաշենի տարածքային հարկային տեսչության պետը:
Միրզոյանը պետական եկամուտների կոմիտեի խոշոր հարկ վճարողների հարկային տեսչության պետից անցում է կատարել դեպի ֆինանսների, ապա արդարադատության նախարարություններ: Նա եղել է նաև արդարադատության նախարարության քրեակատարողական վարչության նյութատեխնիկական ապահովման բաժնի պետը, իսկ ահա 2016 թվականի նոյեմբերից՝ ՍԱՊԾ աշխատակազմի ղեկավարը»,-գրում է թերթը:
Նյութն ամբողջությամբ կարդացեք թերթի այսօրվա համարում:
