Armenpress.am-ը գրում է․
Արցախի Հանրապետության նախկին պետական նախարար Արայիկ Հարությունյանը վստահեցնում է, որ Արցախի կառավարությունը Երկրապահ կամավորական միությանը որևէ մեքենա չի հատկացրել: Ինչպես հաղորդում է «Արմենպրես»-ը, Արայիկ Հարությունյանը «Ֆեյսբուք»-ի իր էջում կատարած գրառմամբ անդրադարձել է Հայաստանի Ազգային ժողովի պատգամավոր, Երկրապահ կամավորական միության նախագահ Մանվել Գրիգորյանի ձերբակալությանը և դրան հաջորդած բացահայտումներին:
«Վերջին օրերին ողջ հայությանը ցնցել են Մանվել Գրիգորյանի ձերբակալությանը հաջորդող՝ ՀՀ ԱԱԾ կողմից հրապարակված բացահայտումները, որոնք անձամբ ինձ համար էլ էին ցավալի: Դրանց արդյունքում որոշ հարցականներ են առաջացել տեսանյութում երևացող գույքի վերաբերյալ: Կարծում եմ, որ պետք է բոլորս սպասենք իրավապահ մարմինների մանրազնին աշխատանքին և վճիռներին, որպեսզի կարողանանք վերջնական գնահատական տալ կատարվածին: Այնուամենայնիվ, հաշվի առնելով այն հանգամանքը, որ ոմանք փորձում են շահարկել ԱՀ կառավարության և իշխանությունների անունը՝ անհրաժեշտ եմ համարում պաշտոնապես հայտարարել, որ կառավարության կողմից որևէ մեքենա չի հատկացվել Երկրապահ կամավորական միությանը, և բոլոր նվիրատվությունների ստացման ու բաշխման մասին ժամանակին հրապարակել ենք մանրամասն հաշվետվություններ»,- գրել է Հարությունյանը:
