Armenpress.am-ը գրում է.
Հաջորդ շաբաթ հայկական պատվիրակությունն իրանական գազի արտահանումը Հայաստան մեծացնելու և նոր գների մասին բանակցելու համար կմեկնի Թեհրան: Ինչպես փոխանցում է «Արմենպրես»-ը, վկայակոչելով Irna գործակալությունը, այդ մասին հայտարարել է Իրանի Ազգային գազային ընկերության միջազգային կապերի հարցերով տնօրեն Բեհզադ Բաբազադեն: Նրա խոսքով, Երևանի ՋԷԿ-ը խնդրում է ավելացնել Իրանից երկնագույն վառելիքի մատակարարման ծավալները: Նա ընդգծել է, որ Իրանի Ազգային գազային ընկերության և Երևանի ՋԷԿ-ի միջև պայմանագիրը վերաբերում է գազը էլեկտրաէներգիայով փոխանակելուն: «Հայաստանը խնդրում է բնական գազի մատակարարումը 1 միլիոնից մինչև 1.6 միլիոն խորանարդ մետր ավելացնել», - պարզաբանել է նա:
Եթե կողմերը համաձայնության գան, ապա Իրանը, համապատասխանաբար, Հայաստան մատակարարվող գազի ծավալը կավելացնի:
Բաբազադեն նշել է, որ իրանական խողովակաշարերը կարող են ավելի շատ գազ ներկրել Հայաստան, և Իրանը գազի արտահանման ծավալների ավելացման հետ խնդիր չունի, քանի որ Երևանը կարող է վճարել կամ փոխարենը Իրանին ավելի շատ էլեկտրաէներգիա տրամադրել:
«Գազ էլեկտրաէներգիայի դիմաց» ձևաչափով իրանական գազի մատակարարումը Հայաստան սկսվել է 2009 թվականին:
