«Իսրայելի խորհրդարանի՝ Քնեսետի հանձնաժողովում հավանության է արժանացել հայերի ցեղասպանության ճանաչման մասին բանաձևը խորհրդարանի լիագումար նիստի օրակարգ ընդգրկելու նախաձեռնությունը:
Դա, իհարկե, դեռ ամենևին չի նշանակում, որ լիագումար նիստում կընդունվի հայերի ցեղասպանության ճանաչման մասին բանաձևը: Եվ ի վերջո Իսրայելում էլ առաջին անգամը չէ, աշխարհում էլ, երբ հայերի ցեղասպանության ճանաչման հարցը հայտնվում է տարբեր երկրների օրակարգում, գերազանցապես այն ժամանակ, երբ տվյալ պետությունը որևէ խնդիր է ունենում Թուրքիայի հետ: Իսրայելը ներկայումս մերձավորարևելյան հարցերում Անկարայի հետ ունեցած խնդրի հետևանքով մեջտեղ է բերում հայերի ցեղասպանության ճանաչման հարցը, որն ակնհայտորեն ունի Անկարայի վրա ճնշում բանեցնելու նպատակ: Պետք է խոստովանել, որ մենք հայտնվում ենք հակասական վիճակում, երբ դառնում ենք հայկական հարցի այդօրինակ խաղարկման ականատես, առավել ևս, երբ հարցերը պարզելուց հետո տվյալ երկիրը վերջնարդյունքում մերժում է հայերի ցեղասպանության հետ կապված նախաձեռնության ընդունումը:
Մի կողմից վիրավորական է, որ մեր ցավը և դատը օգտագործվում է Թուրքիայի դեմ սեփական հարցեր լուծելու համար: Մյուս կողմից մենք չենք կարող չհամակերպվել այդ իրողության հետ, այլապես պետք է հայտարարենք, որ հրաժարվում ենք ցեղասպանության միջազգային ճանաչման օրակարգից և կոչ անենք մյուս երկրներին երբեք չխաղարկել հայկական հարցը:
Ակնհայտ է, որ մենք այլընտրանք չունենք և եթե անգամ գիտենք, որ մեր հարցը խաղարկում ենք, ու եթե անգամ դա մեզ վիրավորում է, մենք ստիպված ենք դիմանալ, որովհետև ինքներս ենք նաև հռչակել միջազգային ճանաչումը պետական օրակարգի մաս: Ի վերջո, հանել հարցը մեր պետական օրակարգից, նշանակում է թուլացնել այդ օրակարգը, որովհետև այստեղ զուտ պահանջատիրության զգայական հարց չէ, այլ իրավաքաղաքական բավականին կարևոր մի կռվան, որը հայկական պետականության միջազգային սուբյեկտության երկու առանցքային հենակետերից մեկն է՝ մյուսն արցախյան խնդիրն է: Այդ հենակետերից մեկից հրաժարվելը չի տա որևէ առավելություն, միևնույն ժամանակ, սակայն, չի էլ օգնի, որ այլևս չխաղարկեն մեր հարցը»,-գրում է թերթը:
Նյութն ամբողջությամբ կարդացեք թերթի այսօրվա համարում:
Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print
Տպել