Դարձյալ ակտիվացել են լուրերը, թե ՀՀ վարչապետի ընտրությունից հետո Գրիգորյանը կրկին գնալու է կառավարություն` որպես բնապահպանության նախարար: Հաշվի առնելով հանգամանքը, որ նրա աշխատանքից օրերս գոհունակություն հայտնեց նաև տարածքային կառավարման և զարգացման նախարար Գավիթ Լոքյանը, բացառված չէ, որ դա Գրիգորյանի պաշտոնը բարձրացնելու ազդակ լինի:
Որպես Արարատի նոր մարզպետացու` շրջանառվում են Արգամ Աբրահամյանի և մարզի ոստիկանապետ Սևան Քոչարյանի անունները: Վերջինս համարվում է Գրիգորյանի մարդը և եթե դառնա Արարատի մարզպետ, ապա Գրիգորյանները կկարողանան պահպանել իրենց դիրքերը մարզում: Արգամ Աբրահամյանի նշանակմամբ դարձյալ տեղի կունենա կլանային իշխանափոխություն` պաշտոնների կգան Աբրահամյանների ազգուտակն ու թիմակիցները: Արգամի կամ Աբրահամյանների վերադարձով անհանգստացած են շատ համայնքների ղեկավարներ ու պաշտոնյաներ, ովքեր ԱԺ ընտրություններում աշխատել են ոչ միայն ՀՀԿ-ի համար, այլև հենց Արգամի դեմ:
Արգամի լոբբինգով վերևներում ակտիվորեն զբաղվում են նրա երկու մերձավորները` հայրը` Հովիկ Արգամիչը, և աները` Գագիկ Ծառուկյանը: Արգամն էլ ձեռքերը ծալած չի նստում, բավական երկար ժամանակ է` նա մարզի որոշ գյուղական համայնքների բնակիչներին տարաբնույթ օգնություններ է ուղարկում` «առաքիչների» միջոցով, խոստանալով, որ անձամբ կհանդիպի բնակիչներին ու կլինի նրանց կողքին: Բայց այդպես էլ տեղաբնակները նրա կենդանի ներկայությունը չեն տեսնում ու զգում իրենց կողքին: Մի խոսքով` մարզում մարզպետի փոփոխությամբ շատ վերաձևումներ կլինեն` կադրային առումով: Դրա համար էլ շատերն անհանգիստ, ոմանք էլ հուսադրող սպասումների մեջ են:
Արարատում դեռևս հստակեցված չէ նաև համայնքների խոշորացման հարցը: Ըստ որոշ լուրերի` հնարավոր է այս մարզում խոշորացում չլինի, իսկ լինելու դեպքում էլ` աշնանից ոչ շուտ:
Հարցին հստակ պատասխան չեն կարողանում տալ թե համայնքների ղեկավարները, թե անգամ տարածքային կառավարման և զարգացման նախարարությունը: Քանի որ նման հարցերը հանրապետությունում միայն մի մարդ է որոշում, իսկ այդ մարդն իր ապագա անելիքների մասին չի կիսվում և այդ հարցի շուրջ ոչ մի հստակ բան չի ասում, բոլորն անորոշության մեջ են:
Մարտի 11-ին մարզի շատ գյուղական համայնքներում տեղի ունեցած ՏԻՄ ընտրությունները, որոնք անցան հիմնականում մեկ թեկնածուով, փաստեցին, որ այս համայնքներում ավելի լուրջ ընտրությունների են սպասում` խոշորացված համայնքների ընտրություններին: Շատ համայնքների ղեկավարներ չգիտեն` մտնե՞լ նախընտրական բարեգործությունների փուլ, թե խնայել նյարդերն ու միջոցները:
Մի խոսքով` Արարատում տարբեր առումներով անորոշություն է: Իսկ անորոշությունը չի կարող արդյունավետ աշխատանք ապահովել: Մարզում կան լուծման ենթակա շատ խնդիրներ, որոնք լուծողներն այսօր նստած «գիր ու ղուշ» են գցում, որ գուշակեն վաղվա իրենց գլխի գալիքը»,-գրում է թերթը:
Նյութն ամբողջությամբ կարդացեք թերթի այսօրվա համարում:
Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print
Տպել