Azatutyun.am-ը գրում է.
Մարդու իրավունքների եվրոպական դատարանն այսօր սկսեց քննել ռուսաստանցի ընդդիմադիր գործիչ Ալեքսեյ Նավալնիի հերթական հայցն ընդդեմ Ռուսաստանի: Նավալնին Պուտինի վարչակազմին մեղադրում է իրեն բազմիցս ապօրինի կերպով ազատությունից զրկելու մեջ՝ Եվրոպական դատարանից պահանջելով «քաղաքական» որակել իրեն ազատազրկելու որոշումները:
Ստրասբուրգյան ատյանն անցյալ տարի ևս քննել էր Նավալնիի ազատազրկման դեպքերին առնչվող հայցն ու փաստել՝ Ռուսաստանի իշխանություններն իսկապես ապօրինի են ընդդիմադիր գործչին զրկել խաղաղ հանրահավաքներին մասնակցելու իրավունքից: Դատարանը Ռուսաստանի կառավարությանը պարտավորեցրել էր 63 հազար եվրոյի փոխհատուցում վճարել Նավալնիին: Մոսկվան, սակայն, այդ որոշման հետ չէր համաձայնել և դիմել էր Եվրոպական դատարանի վերաքննիչ ատյան՝ Մեծ պալատ:
Այսօրվա դատաքննությանը մասնակցելու համար Նավալնին անձամբ էր ստրասուրգյան դատարան եկել՝ բացատրելու, թե ինչու է Կրեմլն այդքան անհանդուրժող Ռուսաստանում ընդդիմության հանրահավաքների ու ցույցերի նկատմամբ: «Դա անհամաձայնություն հայտնելու վերջին հնարավորությունն է, քանի որ մյուս բոլոր հարթակներն արգելափակված են: Մեզ թույլ չեն տալիս զանգվածային լրատվամիջոցներով հանդես գալ, մեզ թույլ չեն տալիս ընտրություններին մասնակցել: Մենք չենք կարող արդարության հասնել դատարաններում: Մեր հասարակական կազմակերպությունները լուծարվում են: Մեր քաղաքական կուսակցություններին չեն գրանցում»,- ՄԻԵԴ-ում այսօր հայտարարեց Ալեքսեյ Նավալնին:
Ամբողջական հոդվածը կարող եք կարդալ այստեղ։
