Հաղորդավար, պրոդյուսեր Հրաչ Մուրադյանն այսօր նշում է ծննդյան 34-ամյակը: Հրաչը որոշել էր այս տարեդարձը նշել այնպես, ինչպես երբեք, ու անել այն ամենն, ինչ երբեք չէր արել: Բայց արի ու տես, որ միշտ չէ, երբ  ամեն ինչ մեր ուզածով է ստացվում: Հրաչին նույնիսկ  տարեդարձի օրը չի հաջողվել խուսափել աշխատանքից: Հոբելյարին BlogNews.am-ը հանդիպել է իր աշխատասենյակում ու զրուցել օրվա անակնկալների, անձնականի ու երջանկության չափանիշների մասին:

Պարզվում է՝  այսօր Հրաչը պետք է ԱՄՆ ուղևորվող ինքնաթիռում լիներ, բայց վերջին րոպեին փոխել է միտքն ու որոշել օրը հարազատների հետ նշել. «Վերջին տարիներին հարազատներիս, մտերիմներիս հետ չեմ եղել, աշխատանքի բերումով ժամանակի մեծ մասը Նահանգներում եմ անցկացնում, որը, ասես, իմ երկրորդ տունն է դարձել: Այս անգամ լսեցի ինքս ինձ ու որոշեցի անել այն ամենն, ինչ ուզում եմ, ապրել առանց օրակարգի, որն իրականում այդքան էլ չստացվեց, քանի որ, ինչպես տեսնում եք, աշխատասենյակում եմ ու զբաղված գործնական հարցերով»:

Հաղորդավարը, կեսգիշերին մոտ տուն մտնելով, անակնկալի է եկել. նրան գեղեցիկ կերպով առաջինը շնորհավորել են մտերիմները. «Զարմուհիս, ընտանիքիս անդամները, մտերիմ ընկերներս հավաքվել էին մեր տանը: Ինձ համար դա իրոք անակնկալ էր: Ընտանեկան շատ ջերմ մթնոլորտում է անցել ամեն ինչ»:

Հետաքրքրվեցինք՝ արդյոք երեկոյան տորթի մոմերը փչելիս հասցրել է երազանք պահել։ Հրաչն իրեն բնորոշ անկեղծությամբ պատասխանեց. «Երազանք չեմ պահել, հավատացեք, որովհետև միշտ ու ամեն տարի երազանք եմ պահում, բայց այս տարի՝ չէ: Նոր հասկացա, որ միտումնավոր երազանք չեմ պահել, որովհետև ոչ թե չունեմ երազանք, այլ, վստահ, ունեմ նպատակներ ու այս տարի դրանք չկապեցի տորթի մոմերի հետ»:

13775473_1031683096879286_756919423765362180_n

Իսկ ահա առավոտյան Հրաչին լավ տրամադրություն է պարգևել գործընկերների անակնկալը. ««Կիսաբաց լուսամուտների» թիմը վիդեոշնորհավորանք էր ուղարկել ինձ, որից անչափ ուրախացա ու հուզվեցի: Շնորհավորանքներն անձնավորված էին, ամեն մեկն ինչ-որ ընդհանուր գիծ էր մեջբերում մեր շփումից:  Առհասարակ, թե՛ մտածելակերպի, թե՛ աշխատանքի կազմակերպման առումով մենք կարծես հեռուստաընկերությունում փոքրիկ ինքնավար հանրապետություն լինենք: Ստացվել է այնպես, որ ժամանակի գերակշռող մասն իրար հետ ենք անցկացնում, ու եթե չլիներ գործից զատ իրար ուրախ պահեր պարգևելը կամ կատակելը, հաստատ չէր լինի այն ջերմությունը կամ այն, ինչը որ տեսանյութում կար: Շնորհակալ եմ բոլորին»:

Պրոդյուսեր-հաղորդավարն այս տարի որոշել է մեծ խնջույք չկազմակերպել. «Երեկոյան հավաքվելու ենք ընկերական շրջապատով, ու վերջապես տեսնելու ենք իրար։ Առիթն իմ ծնունդն է լինելու, բայց որևէ մեկին չեմ խնդրել, որ կենտրոնանա դրա վրա: Այսօր ում որ զանգել եմ՝ ասելու՝ երեկոյան եկեք հանդիպենք, բոլորը զարմանում էին՝ իրոք դա ես եմ ասում: Ցավոք, ծանրաբեռնված աշխատանքային առօրյայի մեջ միշտ չէ, որ կարողանում ենք ժամանակ գտնել ընկերների համար: Մարդիկ կան, նույնիսկ ամիսներով չեմ տեսել, շփվել ենք միայն հեռախոսով»:

Հրաչին տարիքն այնքան էլ չի վախեցնում, ասում է՝ իրեն զգում է, ինչպես 27 տարեկանում. «Ես հոգով 27 եմ, իմ պահվածքով 27 եմ, հույս ունեմ՝ տեսքով էլ 27 եմ (ժպտում է). համենայն դեպս, այդպես են ասում։ 21 տարեկանում էլ էին ինձ ասում՝ 27  տարեկան ես, հիմա էլ են ասում՝ 27 տարեկան ես: Կյանքի ռիթմն այնպիսին է, որ հաստատ  ժամանակ չունես նկատելու, թե դու քանի տարեկան ես կամ ինչ տարիքի ես երևում: Ես շատ հանգիստ ու  ներդաշնակ եմ իմ տարիքի հետ։ Բացարձակ լավ ու վատ չեմ զգում դրանից: Ընդունում եմ այնպես, ինչպես կա, որովհետև 34-ը հաճելի 34 է, համենայն դեպս, այն գիտակից տարիները, որ ես ապրել եմ ինքնուրույն»:

21558789_1409612705752988_8176044673211477451_n

Հոբելյարը նվերների արժեքը բացարձակ գնով չի պայմանավորում։ Նրան կարելի է ուրախացնել նույնիսկ ամենաչնչին ուշադրությամբ. ««Կիսաբացի» առավոտյան տեսանյութն, օրինակ, ասվածի լավագույն ապացույցն է: Դա մեծ ֆինանսների հետ կապված չէր, բայց շատ մեծ վերաբերմունքի ու սիրո նշան էր: Ինչպես կարող ես ֆինանսն այդտեղ որպես չափման միավոր դնել: 34-ում հաստատ ուշադրություն չես դարձնում՝ Alexander McQueen-ի վերջին հավաքածուից ես նվեր ստանում, թե… Չնայած դա նույնպես հաճելի է: Դժգոհ չէի լինի, եթե հիմա Range Rover Vogue-ի բանալիներ էլ նվեր ստանայի ծնունդիս: Չէի ասի՝ վա՜յ, չէ: Սակայն եթե լիներ Range Rover, ու չլինեին սեր ու ջերմություն, ինչքանո՞վ ինձ պետք կգար այդպիսի շքեղությունը»:

Հրաչը երջանկության իր ընկալումներն ունի, ու հարցին՝ ի՞նչն է հիմա պակասում իրեն լիարժեք զգալու համար, հաղորդավարն ասաց. «Երբ կգտնվի ինչ-որ մեկը, ում լիարժեք այս կյանքում երջանիկ լինելու համար ինչ-որ մի բան չի պակասի, ինքն ամենադժբախտ մարդը կլինի իմ կարծիքով: Ամենակարևոր բանը, որ հասկացել եմ 34 տարիների ընթացքում, այն է, որ երջանկությունն իրական է, եթե դու չես գտնում գնահատման սանդղակ այն չափելու համար: Ես այս շրջանում ամեն ինչի մեջ շատ երջանիկ եմ՝ և՛ անձնականի, և՛ գործնականի: Փակագծերն ավելի բացել չեմ ուզում, քանի որ անձնականը երկու կողմ ունի՝ իմ և դիմացինի։ Գուցե ես, հանարային մարդ լինելով, պարտավորված եմ իմ անձնականը որոշակիորեն չակերտներից դուրս պահելու, բայց դիմացինս պարտավոր չէ, և ես հարգում եմ նրա այդ իրավունքը»: 

23471920_1452806341433624_8698647571829833774_n

Նյութը՝ Էմմա Վարդանյանի

 

Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print Տպել