Panarmenian.net-ը գրում է.
Իրավաբան Ամալ Քլունին կներկայացնի ահաբեկչական «Իսլամական պետության» կողմից ցեղասպանության ենթարկված եզդիների շահերը, գրում է Gazeta.ru-ն:
Տարածքներ գրավելով Իրաքի հյուսիսում` ԻՊ զինյալները սկսեցին զանգվածային սպանություններ իրականացնել: Իսլամիստները էթնիկ զտումներ ու ջարդեր են իրականացնում, որոնց, ըստ 2015-ի նախնական տվյալների, զոհ է գնացել մոտ 20 հազար եզդի, տասնյակ հազարավորները ստիպված եղան լքել իրենց տները:
«Եվրախորհրդարանը, ԵԽ Խորհրդարանական վեհաժողովը, ԱՄՆ կառավարությունն ու Մեծ Բրիտանիայի համայնքների պալատը ճանաչել են եզդիների ցեղասպանությունը, որն իրագործել են ԻՊ ահաբեկիչները հյուսիսային Իրաքում: Ինչպե՞ս է պատահել, որ մարդկությանը հայտնի լրջագույն հանցագործությունները մեր աչքի առաջ են կատարվում, սակայն չեն հետապնդվում Հաագայի Միջազգային դատարանի կողմից»,-ասել է Քլունին:
Քլունիի պաշտպանյալներից է Նադիա Մուրադը, որին 2014-ի նոյեմբերին հաջողվեց փախչել գերությունից 3 ամիս տևած խոշտանգումներից հետո: Այժմ Մուրադը հայտնի գործիչ է, նա ներկայացվել էր որպես Նոբելյան խաղաղության մրցանակի հավակնորդ:
ՄԱԿ Մարդու իրավունքների գծով գերագույն հանձնակատարի գրասենյակի 2015-ի զեկույցում ասվում է, որ «Իսլամական պետության» գրոհայինները ցեղասպանություն են իրագործում Իրաքում՝ կրոնական ազգային փոքրամասնության՝ եզդիների հանդեպ:
ՀՀ ԱԺ-ում շրջանառության մեջ է դրվել «Հյուսիսային Իրաքում Իսլամական պետություն ահաբեկչական խմբավորման կողմից եզդիների նկատմամբ իրականացված ցեղասպանությունը դատապարտելու մասին» ԱԺ որոշման նախագիծը:
