Իրանական ISNA լրատվական գործակալության փոխանցմամբ՝ իրանական հրթիռները կարող են հասնել Իսրայել։ Այդ մասին հայտարարել է Իրանի Իսլամական հեղափոխության պահակազորի հրամանատար, գեներալ-մայոր Մոհամմադ Ալի Ջաֆարին:
«Նա, ով թշնամաբար է տրամադրված Իրանի հանդեպ, բնականաբար ավելի շատ կվախենա մեր երկրի ռազմական հնարավորություններից ու նվաճումներից։ Իսլամական հեղափոխության պահակազորի հրթիռների մեծ մասն ունի թռիչքի բավական հեռահարություն՝ հասնելու համար այն տարածք, որը զբաղեցվել է Իսրայելի սիոնիստական ռեժիմի կողմից»,- ասել է նա։
Ջաֆարին այդ հայտարարությունն արել է Իսլամական հեղափոխության պահակազորի օդատիեզերական ու հրթիռային ստորաբաժանումների կողմից հաջողությամբ բալիստիկ հրթիռներ փորձարկելուց հետո։ Ջաֆարին հայտարարել է, որ Իրանի հրթիռային պոտենցիալն ուղղված է բացառապես Իրանի ու հարևան երկրների անվտանգության ապահովմանը։