Tert.am-ը գրում է.
2016 թ-ից Եվրասիական տնտեսական միության տարածքում գործում է դեղերի նույնականացման սկզբունքը, որն առաջին հերթին՝ վերաբերում է դեղերի գրանցմանը: Այս մասին Tert.am-ի հետ զրույցում ասաց ՀՀ առողջապահության նախարար Արմեն Մուրադյանը:
Նախարարի խոսքով՝ 2025թ.-ից ԵՏՄ տարածքում գործելու է մեկ ռեեստրով գրանցման մեխանիզմ, այսինքն՝ անդամ պետություններում արտադրվող ու շրջանառվող բոլոր դեղերն այսուհետ գրանցելու են մեկ կետում:
«Այս պահին, մենք նույնականացրել ենք դեղերի գրանցման սկզբունքները, բոլոր դեղերը ԵՏՄ տարածքում գրանցվում են նույն սկզբունքներով, չափանիշներով: Իսկ տասը տարի անց մենք կունենանք նույնականացված սկզբունքների հիմքում մեկ ռեեստր, որտեղ կգրանցվեն բոլոր դեղերը»,- ասաց առողջապահության նախարարը:
Դեղորայքի գրանցումից բացի, Մուրադյանի խոսքով, կա նաև ներմուծման մեխանիզմ, որը ևս նույնականացվել է: «Գիտեք, որ քննարկվում է «Դեղերի մասին» նոր օրենքը, որով բավական խստացվում է դեղորայքի շրջանառությունը, կարգավորվում են պետական գները, համապատասխանեցվում են ԵՏՄ պետությունների գներին»,- նշեց նա:
Հարցին՝ դեղորայքի միասնական շուկան նպաստելո՞ւ է դեղերի գների նվազմանը, Արմեն Մուրադյանը նախ հիշեցրեց, որ տարվա ընթացքում գները նվազել են, ապա շեշտեց. «Դեղորայքի շուկան աշխարհով մեկ ազատ շուկա չէ: Հաշվի առնելով, որ դեղը սոցիալական ապրանք է, պետությունը կարգավորիչ դեր է պահում: Մի տեղ դա արվում է էսենցիալ փաթեթի՝ կենսունակության դեղորայքների վրա, մի ուրիշ տեղ՝ փոխհատուցվող դեղերի փաթեթի վրա, որը մենք ևս ուզում ենք գործի դնել»:
Անդրադառնալով նույն դեղամիջոցի գների տարբերությանը հարևան երկրում, եվրոպական երկրներում՝ Ա. Մուրադյանը նշեց, թե «Դեղերի մասին» նոր օրենքով կարգավորվում է զուգահեռ ներմուծման հարցը:
«Նույն արտադրողից տարբեր երկրներին վաճառած դեղի գինը կարող է կոնկրետ նվազ լինի ու փոքր երկրում, որտեղ վաճառվել է փոքր ծավալ, գինը կարող է լինել բարձր: Օրենքով նկարագրված են կետերը, որոնք բացառելու են զուգահեռ ներմուծում հասկացողությունը: Եթե ժամկետների, բաղադրիչների տարբերություն կա, դա զուգահեռ ներմուծում այլևս չի հանդիսանալու: Իսկ կա նույն հարթակի այլ դեղ, որն ավելի էժան է, արտադրվել է արտադրողական նույն հարթակում, յուրաքանչյուր սուբյեկտ, որը լիցենզիա կունենա, կարող է ներմուծել: Սա կանոնակարգելու է որակը ու նպաստելու է դեղերի գների նվազմանը: Մենք փորձում ենք համադրել՝ բարձր որակը մատչելի գների հետ»,- մասնավորեցրեց առողջապահության նախարարը:
