Ամեն ինչ արվելու է՝քաղաքացիների տոնական տրմադրությունը պատահարներով չփչացնելու համար. Նորիկ Սարգսյան

Ճանապարհային ոստիկանության ճանապարհապարեկային ծառայության բաժնի պետ, ոստիկանության գնդապետ Նորիկ Սարգսյանն այսօր մամուլի ասուլիսին,  անդրադառնալով ամանորյա աշխատանքներին,  նշեց, որ ոստիկանությունը երեք-չորս օր առաջ անցել է ուժեղացված տարբերակով ծառայության  և, հատկապես, մայրաքաղաքի շուկաներում, առևտրի մյուս կետերում, խաչմերուկներում երթևեկությունը կարգավորելու համար ոստիկանությունը կենտրոնացրել է ուժերը:

 

«Ամեն ինչ արվելու է՝ քաղաքացիների տոնական տրմադրությունը պատահարներով և խցանումներ չփչացնելու համար»,-ասաց նա և նշեց, որ ներողամտություն չի ցուցաբերվելու ոչ սթափ վիճակում վարորդների նկատմամբ և հայտնաբերելու դեպքում, վարորդը հեռացվելու է մեքենայից, ուղևորներին տեղափոխելու են իրենց անհրաժեշտ վայր, իսկ մեքենան տեղափոխվելու է ոստիկանություն:

«Ավելի լավ է մարդկանց տրամադրությունը խաթարվի ճանապարհային ոստիկանության կողմից կազմված արձանագրությամբ, քան ճանապարհատրանսպորտային պատահարներով: Կոչ եմ անում բոլոր վարորդներին ղեկին լինել միայն սթափ և ավելորդ շտապողականություն չցուցաբերել»,-ասաց նա:

Նորիկ Սարգսյան ներկայացրեց 2015 թվականում հունվարի մեկից տասն ընկած ժամանակահատվածի տվյալներն, ըստ որի, գրանցվել է 87 պատահար, որի արդյունքում զոհվել է 6 մարդ, վիրավորվել 128 մարդ  և պատահարների 24-ի դեպքում վարորդը եղել է ոչ սթափ վիճակում:
Այս ցուցանիշները՝ համեմատած 2014 թվականի նույն ժամանակահատվածի հետ՝ պատահարների թիվն ավելի է տասով, սակայն զոհերի թիվը չորսով պակաս է և հինգ վիրավորով՝ ավելի: