EXCLUSIVE
Մարտի 18-ը երգչուհի Լայանայի և իր ամուսնու՝ Ռոլանդ Պողոսյանի համար ամենահիշարժան օրն է. այդ օրը լույս աշխարհ է եկել նրանց առաջնեկը՝ փոքրիկ Էլինան: Ի դեպ, այսօր Էլինան դառնում է չորս ամսական, իսկ օրեր առաջ BlogNews.am–ը երջանիկ ծնողների հետ մի ամբողջ օր է անցկացրել և լուսանկարել նրանց: Նկարահանման ամբողջ ընթացքում փոքրիկ Էլինան իրեն իսկական հերոսուհու պես էր պահում և միայն ժպտում էր:
Լայանան իր հղիության մասին պատահաբար է իմացել, երբ մեկնել էր հյուրախաղերի, իրեն լավ չի զգացել. «Երբ վերադարձա, ամուսնուս հետ այցելեցինք բժշկի, և հենց այդտեղ էլ մեզ հայտնեցին այդ բարի լուրը»,- հիշում է Լայանան և ավելացնում, որ զգացողությունները պարզապես աննկարագրելի էին:
Զույգը խոստովանում է՝ Էլինան փոխել է նրանց կյանքը, օրը սկսվում և ավարտվում է փոքրիկի հետ: Իսկ անվան ընտրության հարցում նրանք երկար չեն մտածել. «Ռոլանդի մայրիկի անունը Էլլա է, իսկ իմ մայրիկինը՝ Գալինա: Վերցրել ենք Էլլայի «էլ» և Գալինայի «ինա» մասնիկները, իսկ արդյունքում ստացվել է Էլինա: Այս անունը մեծ խորհուրդ ունի իր մեջ»:
Երբ առաջարկեցի Լայանային նկարագրել դստերը, նա այսպես պատմեց. «Շատ ժպտերես է, ժպտում է անխտիր բոլորին, լինի ծանոթ, թե անծանոթ: Շարժուն է, քնում է ռեժիմով, կարծես թե կարգ ու կանոնով է և չափազանց հանգիստ»:
Լայանան և Ռոլանդը հաճախ են դուրս գալիս դստեր հետ զբոսնելու, ծնողներն իրենց ոչնչից չեն զրկել. «Ես աշխատանքի վերադարձել եմ, երբ բալիկս երկուսուկես ամսական էր, առիթից օգտվեցի, որ նա խելոք երեխա է: Ես չափազանց ակտիվ հղիություն եմ տարել, բայց բալիկս գիշերները հրեշտակի պես է քնում, շնորհակալություն իրեն դրա համար»:
Վերջում հետաքրքրվեցի, թե ում է ավելի նման Էլինան, Լայանան այսպես պատասխանեց. «Ամեն վարյկյան նմանեցնում ենք մեզանից ինչ-որ մեկին, իսկ կողքից կարծիքներն էլ միշտ բաժանվում են երկու մասի: Այդ պատճառով կարծում եմ՝ վաղ է ինչ-որ բան ասել»:
Նյութը՝ Սիրանուշ Գրիգորյանի
Լուսանկարները՝ Կարեն Հովհաննիսյանի
Նկարահանումն իրականացվել է Kantar հյուրանոցային համալիրում
