Երեկ ՍԻՄ Ազդակ ակումբում ՄԻԱԿ քարտուղար եւ ԱԺ ՀՀԿ խմբակցության պատգամավոր ՆԱԻՐԱ ԿԱՐԱՊԵՏՅԱՆԸ խոսելով վերջին շրջանում տեղի ունեցող ներքաղաքական մի փոքր լարվածությունից նշեց, որ. ՙՇատ բնական է, որ ընտրությունների նախաշեմին քաղաքական դաշտում նկատվում է ակտիվություն, դա պայմանավորված է տարբեր քաղաքական հայացքների եւ ուժերի կողմնորոշմամբ, իրենց նախագահի թեկնածուն ունենալու, այս կամ այն դաշտում վառ արտահայտված հնարավոր թեկնածուին սատարելու հարցում: Եվ այն, որ այդ գործընթացը սկսվում է աշնանը, այսինքն` ընտրություններից չորս-հինգ ամիս առաջ, բնականոն ընթացքի մեջ է ամեն բան՚: Ինչ վերաբերում է ՀՀԿ եւ ԲՀԿ փոխհարաբերությունների մի փոքր լարվածությանը, պատգամավորը կարծում է. ՙԵս լարվածություն չէի ասի, իսկ ես, ինչպես գիտեք, ՄԻԱԿ-ից եմ, եւ վերը նշված կուսակցությունների հետ կապված խոսում եմ դիտորդի տեսակետից, այնուհանդերձ, չեմ կարծում, որ լարվածություն կա, որովհետեւ ի սկզբանե կուսակցությունները եղել են առանձին քաղաքական ուժեր, առանձին քաղաքական ծրագրերով, ինչ-որ մի հատվածում կազմվել է քաղաքական կոալիցիա, ինչը նույնպես շատ բնական է, եւ ներկայումս ԲՀԿ-ն գտնում է, որ այս ձեւաչափով նրանք պետք է գործեն որպես առանձին կուսակցություն` ներկայացնելով այլընտրանքային կարծիք՚: 
-Վ. Օսկանյանին անձեռնմխելիությունից զրկելու ելույթի ժամանակ Դուք շատ կոշտ շեշտադրումներ կատարեցիք, ինչո՞վ էր դա պայմանավորված:
- Նախ նշեմ, որ ես պարոն Օսկանյանի անձը, իրոք, շատ հարգում եմ, եւ իմ շեշտադրումը վերաբերում էր այդ գործընթացի քաղաքականացմանը, եւ որեւէ նրբերանգ Վ. Օսկանյանին` իբրեւ մեղադրյալ, գործում ներգրավելու մեր համաձայնության մեջ չեմ տեսնում: Եվս մեկ անգամ ցանկանում եմ շեշտել, որ անձեռնմխելիությունից զրկել հասկացողությունը իր մեջ պարունակում է ավելի խորը դրույթներ, այն է` ձերբակալության, կալանավորելու հնարավորություն: Ազգային Ժողովը հնարավորություն է տվել միմիայն պարոն Օսկանյանին ընդգրկել որպես մեղադրյալ, նա շարունակում է իր գործունեությունը որպես պատգամավոր, եւ, իմ կարծիքով, որպես մեղադրյալ անձ ընդհանրապես, հնարավորություն է ունենում ավելի խորը ծանոթանալ նյութերին, ունենալ փաստաբաններ եւ շատ ժամանակ տեղեկանալ այնպիսի բաներից, որոնք հրապարակման ենթակա չեն: Մենք բոլորս սպասում ենք` պարոն Օսկանյանը ցուցմունք կտա, կապացուցի, որ նա, իրոք, անմեղ է, եւ այս հարցը կփակվի եւ մեր աշխատանքը կշարունակվի բնականոն ձեւով: Անձեռնմխելիությունից զրկելով, մենք ընդամենը ճանապարհ ենք տվել արդարադատությանը գործը առաջ տանելու: 
- Ձեր կարծիքով, արդյոք պրն Օսկանյա±նն էր այն ՙձկան գլուխը՚, որից հարկավոր էր բռնել:
- Ես կրթությամբ իրավաբան չեմ եւ չեմ կարող դատել մարդկանց մասին, ինչ վերաբերում է այդ արտահայտությանը, ապա ՀՀ նախագահի ասածից ես հասկանում եմ, այն, որ երկրում կան խնդիրներ, որոնք պետք է լուծել սկզբնաղբյուրից, այլ ոչ թե արտահայտման ձեւերից: Եթե խոսենք բժշկական տերմինններով, ապա ոչ թե հարկավոր է սիմպտոմները բուժել, այլ հիվանդությունը:
- Ստացվում էր, որ Օսկանյա՞նն էր այդ հիվանդը:
- Ես կրկնում եմ, որ չեմ կարող դատել մարդկանց, եւ լինելով այս երկրի քաղաքացի կարող եմ ասել, որ տեսնում եմ մի քանի դեպքեր, որոնք խոշոր արձագանք են ձեռք բերել, նույն Վազգեն Խաչիկյանը, ով այժմ կալանավորված է ,եւ նույնպես հրաժարվում է ընդունել իր մեղքը, որը եւս գտնում եմ անընդունելի, հավասարաչափ եւ անկախ մարդու կուսակցական պատկանելությունից, քանի որ օրենքի առջեւ բոլորը հավասար են: 
- Դուք գտնում եք, որ Վ. Օսկանյանի գործը զուտ իրավական հարթության վրա՞ է:
- Այո, եւ տվյալ դեպքում ես շատ ուշադիր լսել եմ, թե՞ ՀՀ գլխավոր դատախազի եւ թե՞ պարոն Օսկանյանի ելույթները, որոնց նաեւ հարցեր եմ ուղղել, եւ կարող եմ ասել, որ Վ. Օսկանյանի ելույթը ավելի շատ հուզական էր, եւ չտեսա որեւէ մի արտահայտություն գործի հետ կապված: Եվ միայն դրա վրա հիմնվելով կարող եմ ասել, որ այստեղ քաղաքական երանգ չկա: Այնուամենայնիվ, կարծում եմ, որ դեռ գործը ընթացքի մեջ է, եւ չեմ տեսնում Վ. Օսկանյանի եւ իրեն սատարող քաղաքական ուժի նկատմամբ որեւէ հետապնդում:
- Ձեր կարծիքով, ընդդիմադիր դաշտում կա՞ արդեն կողմնորոշում միասական թեկնածուի:
- Որքանով ես հետեւում եմ լրատվական դաշտի հրապարակումներին, ապա կարող եմ ասել, որ կարծես վերջնական կողմնորոշում չկա, որովհետեւ միշտ հնչում են տարբեր անուններ, եւ դա գալիս է նրանից, որ եթե լիներ ընդդիմադիր դաշտում համապատասխան քաղաքական որոշում, դա հրապարակված կլիներ: Եվ եթե կրկին անգամ վերադառնանք իրավական դաշտ, ապա քաղաքական ուժը երբ առաջադրում է նախագահի թեկնածու, այդ որոշումը կայացնում է համապատասխան բարձրագույն մարմինը, դա կլինի քաղաքական խորհուրդ, համագումար եւ այլն: Հիմա իբրեւ դիտարկում, կարող եմ ասել, որ ընդդիմադիր դաշտում դեռ միասնական կողմնորոշում չեմ նկատում:
- Դուք տեսնո՞ւմ եք Վարդան Օսկանյանին որպես նախագահի թեկնածու:
- Իբրեւ ՄԻԱԿ-ի քարտուղար եւ ՀՀԿ խմբակցության պատգամավոր ես դիտարկում եմ, որպես նախագահի ամենահնարավոր եւ ամենաընդունելի թեկնածու գործող նախագահ Սերժ Սարգսյանին: Ճիշտ է, տարեվերջին մեր կուսակցության բարձրադիր մարմինը նույնպես որոշում կկայացնի, եւ մենք երբեւէ չենք թաքցրել, որ սատարում ենք նախագահ Սարգսյանի իրականացրած բարեփոխումներին եւ ծրագրին եւ կարող եմ նշել, որ ներկայումս դաշտում տեսնում եմ Ս. Սարգսյանին: Թեկնածուներ կարող են լինել շատ, նույնիսկ եղել է դեպք, երբ 15 նախագահի թեկնածու ենք ունեցել, բայց ես Վարդան Օսկանյանին չէի ընտրի իբրեւ նախագահի թեկնածու, ես նրան տեսնում եմ որպես պատգամավոր: 
- Դուք այսուհետ ԵԽԽՎ-ում փոխարինելու եք Հերմինե Նաղդալյանին: Չունե՞ք մտավախություն, որ չեք արդարացնի նրա սպասելիքները, եւ ձեր միջեւ տարաձայնություններ կա՞ն, թե` ոչ:-Որեւէ տարաձայնություն չկա, առավել եւս կին պատգամավորների միջեւ: Եվ ցանկանում եմ նշել, որ յուրաքանչյուր պատգամավոր իր կյանքում գոնե առաջին անգամ մտնում է ԵԽԽՎ, եւ այդ տեսանկյունից ասել, որ ես չեմ արդարացնի սպասելիքները` կցանկանայի հստակեցնել, որ դրանք ոչ թե Հերմինե Նաղդալյանինն են, այլ Հայաստանի Հանրապետության ներկայացվածությանն է ԵԽԽՎ-ում, որը բավականին պատասխանատու մարմին է: Անհամեստություն անելով պետք է ասեմ, որ ԱԺ ես ուսանողական նստարանից չեմ եկել, ունեմ կուտակած գիտելիքների բազա, տիրապետում եմ օտար լեզուների եւ, կարծում եմ, որ եթե մեկ տարի անց նույն ֆորմատով հանդիպենք` դուք կհամոզվեք, որ կարողացել եմ օգուտ բերել ԵԽԽՎ-ում ՀՀ-ին:
-Կարո±ղ եք ասել, Ձեզ ՀՀ-ում ԱՄՆ դեսպանի հայտարարությունը Վ. Օսկանյանի հետ կապված ե±ւս անհանգստացրեց, քանի որ ՀՀԿ-ն կարծես ցայտնոտի մեջ էր հայտնվել:
- Ես կասեմ, որ տպավորությունը սխալ էր, եւ որեւէ ցայտնոտ կամ զարմանք մենք չենք ապրել, պարզապես ցավում ենք, որ ԱՄՆ-ի պես պետությունը կարող էր հարցը խորությամբ չուսումնասիրել եւ հանդես գալ նման հայտարարությամբ: Հարցին պետք էր համակողմանի մոտենալ:
- Ինչի±ց վերցրեցիք, որ հարցը ուսումնասիրված չէր խորքից:
- Լինելով ներսում` ես տեսնում եմ այլ հիմքեր ու փաստեր, եւ իմ խորին համոզմամբ ՀՀ նախագահական ընտրություններին կարող են միջամտել միայն ՀՀ-ում ներկայացված քաղաքական ուժերը, եւ դա միայն ՀՀ քաղաքացիների ընտրությունն է: 
- Իսկ դրսի ուժերի ներգրավվածությունը մեր ընտրություններին ինչպե±ս եք վերաբերվում:
- Ինձ համար դա միֆ է: 
- Ձեր կարծիքով, ո՞վ է լինելու Սերժ Սարգսյանի իրական մրցակիցը:
- Ես ներկայումս իրական մրցակից չեմ տեսնում:
- Իսկ Ձեր կարծիքով, ԲՀԿ-ն կունենա՞ իր թեկնածուն:
- Դժվարանում եմ կանխատեսումներ կատարել, բայց մի բանում եմ ուզում համոզված լինել, որ քանի թեկնածու էլ ներկայացված լինի, եթե անգամ լինի շատ ուժեղ միասնական թեկնածու, ապա հուսով եմ, որ ամեն ինչ կանցնի ազնիվ պայքարում եւ կլինի արդար ու կկարողանանք մեկ անգամ եւս ապացուցել, որ գլուխ կախելու տեղ չունենք: 
- Հայտնի է, որ կիրակի օրը Հանրապետության հրապարակում Երեւանի տոնին նվիրված միջոցառումից հետո կրկին անգամ հրդեհ է բռնկվել, իսկ դրանից առաջ փուչիկներ պայթեցին: Չե՞ք կարծում, որ մեր տոնակատարությունները անվտագն չեն:
- Ես այն կարծիքին չեմ, որ անվտանգ չեն, դրանք ուղղակի տեխնիկական հարցեր են, եւ գիտեք նաեւ, որ այս տարվա մեջ երկու անգամ հրդեհվեց նաեւ ՀՀԿ-ի գրասենյակի տանիքը: Իսկ փուչիկները դեպքը բերել ու քաղաքականացնել ճիշտ չէ, դա դժբախտություն էր, եւ եւս մեկ անգամ գլուխ եմ խոնարհում այդ երիտասարդների առջեւ, ովքեր կարողացան ըստ արժանավույն հասկանալ, ապաքինվեցին, ոտքի կանգնեցին ու չկոտրվեցին: Դրանք տեխնիկական վրիպումներ են, որոնց պետք է ուշադրություն դրաձնել, ինչպես վերջերս ֆուտբոլի հեռարձակման ժամանակ 34 րոպե մեկնաբան չկար:
- Համերգի հետ կապված ֆեյսբուքում եղան հայտարարություններ, որ այն շատ անճաշակ էր, մեծ գումարներ էր ծախսվել եւ ՌԴ-ից հրավիրված հյուրերը այդքան էլ ներկայանալի չէին մեր բարձրաստիճան էլիտային:
- Ես կարող եմ ասել, որ իմ հոգում տոն եմ զգացել` նայելով բոլոր կազմակերպված միջոցառումները, եզրափակիչ համերգը նույնպես հավանել եմ: Ինչ վերաբերում է ծախսված գումարներին, ապա դուք գիտեք, որ քաղաքային բյուջեն ունի առանձնացված տողեր, եւ ամեն ինչի համար կան առանձնացված գումարներ, եւ տվյալ դեպքում, կարծում եմ, դրանք ծախսվել են: Կարող են լինել տարբեր երաժշտական ճաշակներ, ես քաղաքային իշխանության ներկայացուցիչ չեմ եւ չեմ կարող ասել, թե ինչպես է կատարվել ընտրությունը: 
- Եթե փորձեք համեմատական անցկացնել, ապա ինչպե±ս կանցնեն 2013-ի ընտրությունները:
- Ես լիահույս եմ, որ 2013-ի նախագահական ընտրությունները կանցնեն առանց որեւէ էքսցեսների, որովհետեւ բացի համապետական ընտրություններից, տեղի ունեցան նաեւ ՏԻՄ ընտրություններ: Միգուցե մասշտաբային համեմատությամբ սխալ կդիտվի ձեր կողմից, բայց տարեցտարի նայելով, սկսած 90-ականներից, եւ այն ինչ կատարվում էր այն ժամանակ, բոլորս քաջ հիշում ենք ու մասնակից ենք եղել: Այնուհետ 1996-98-99թթ., եւ այլն, եւ այդ կտրվածքով մենք ունենք բացարձակ ձեռքբերումներ, սակայն դա չի նշանակում, որ այսօր մեր ընտրական համակարգն անթերի է: 
ՙԻրավունքի՚ այն հարցին, թե ինչպես եք վերաբերվում այն պատգամավորներին, որոնք սկսում են խորհուրդներ տալ միմյանց, ինչպես դա արեց Նաիրա Զոհրաբյանը Էդուարդ Շարմազանովին` հարցին Ն. Կարապետյանը նկատեց. 
- Երբ մեկ քաղաքական գործիչն մեկ այլ գործչի սկսում է խրատական արտահայտություններ տալ դա սխալ է, որովհետեւ պատգամավորները ունեն նույն լիազորությունները, այսինքն` մեկ ձայն` կողմ, դեմ, ձեռնպահ եւ դրանից ավել ոչինչ: Իսկ թելադրել սեփական կածիքի գերազանցությունը, առանց որեւէ հիմքի ներկայացման, ապա դա սխալ եմ համարում: Ինքս չեմ ընդունում եւ ինձ երբեւէ թույլ չեմ տա սրա-նրա նկատմամբ հանդես գալ, իսկ նման բան նկատելուց, կապ չունի թե ում կողմից է, միանգամից կհնչեցնեմ իմ բացասական կարծիքը:
- Այսինքն` խիստ գործնականից անցում է կատարվում անձնական դա՞շտ:
- Այո, դա միանշանակ անձնական բնույթ ունի, որովհետեւ եթե խորհուրդ է տրվում բառերի մանիպուլյացիայով չզբաղվել եւ նույն բառերի մանիպուլյացիան օգտագործվում է նույն մարդկանց կողմից, դա, մեղմ ասած, ծիծաղելի է:

ԱՐՄԵՆՈՒՀԻ ՀԱԿՈԲՅԱՆ

iravunk.com

Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print Տպել