Թուրքիայի ազգային մեծ ժողովի գլխավոր խորհուրդը փակ նիստի ժամանակ որոշում է կայացրել Սիրիայի հարցով, փոխանցում է թուրքական «Հյուրիյեթ» պարբերականը:
Թուրքական խորհրդարանն իրավունք է տվել երկրի կառավարությունը Սիրիայի տարածքում ռազմական գործողություններ իրականացնել:
Համապատասխան որոշումն ընդունվել է 320 կողմ, 129 դեմ ձայներով: Որոշումը թույլատրում է Թուրքիայի կառավարությանը մեկ տարվա ընթացքում երկրից դուրս ռազմական գործողություններ իրականացնել, անհրաժեշտ վայրեր գործուղել թուրքական բանակի զինծառայողներին:
Այսպիսով, այժմ Թուրքիայի իշխող «Արդարություն և զարգացում» կուսակցության առաջնորդ, երկրի վարչապետ Թայիփ Էրդողանի գլխավորած կառավարությունն է որոշելու Սիրիայի դեմ հնարավոր ռազմական գործողություններ իրականացնելու հարցը:
Հիշեցնեմ, որ հոկտեմբերի 3-ին Թուրքիայի Աքչաքալե բնակավայրը հրետակոծման էր ենթարկվել Սիրիայի տարածքից. սպանվել էր 5 մարդ: Թուրքական կողմը պատասխան կրակ էր արձակել` սպանելով 34 սիրիացու:
