50,000 մարդուց մեկը տառապում է Թրիչեր Քոլինզի համախտանիշով։ Ջոնո Լանքաստերի մոտ ևս հայտնաբերվել է այս հազվագյուտ հիվանդությունը։ Դեռևս ներարգանդային շրջանում պտղի ոսկորների ու հյուսվածքների զարգացումը խանգարվում է, ինչի արդյունքում երեխայի դեմքը տձևանում է։ Այս համախտանիշով ծնված մարդիկ ոչ միայն առողջական, այլև էմոցիոնալ խնդիրների են բախվում։ Այս մարդիկ անվստահ են զգում իրենց և բարդույթավորվում իրենց արտաքին տեսքից։ Ջոնոն նշել է, որ իրենից երկու տասնամյակ է պահանջվել, որպեսզի ինքը կարողանար սիրել իր դեմքը։ Նա փորձում է իր համախտանիշով երեխաներին օգնել ազատվել հնարավոր բարդույթներից ու ինքնավստահություն սերմանել նրանց մեջ։ 
Ջոնոն ներկայումս 30 տարեկան է։ Նրան հաջողվել է ձերբազատվել թերարժեքության բարդույթից, սակայն նա ցանկանում է, որպեսզի մյուսներն էլ իմանան իր պատմության մասին։
Նա ուղևորվեց Ավստրալիա՝ Զաքարի Վոլթոնին այցելելու։ Երկու տարեկան այս փոքրիկը ևս տառապում է Թրիչեր Քոլինզի համախտանիշով։
Ավստրալիայում եղած ժամանակ նա այցելեց տարբեր երեխաների, ում մոտ առկա էր այս համախտանիշը։
Ջոնոն ցանկանում է ոգեշնչել երեխաներին, հասկացնել, որ նրանք միայնակ չեն, որ աշխարհում իրենցից բացի էլի մարդիկ կան, ովքեր տձև դեմք ունեն, սակայն դա դեռ աշխարհի վերջը չէ։
«The Advertizer»-ին տված հարցազրույցում Ջոնոն նշել է. «Ես շատ կցանկանայի ավելի վաղ տարիքում հանդիպած լինել ինձ նման մեկին, մեկին, ով աշխատանք ու ընկերուհի ուներ, մեկին, ով կասեր ինձ.
Դու ևս կարող ես այս ամենին հասնել»։
