1988 թվականի աղետալի երկրաշարժից անցել է 26 տարի, սակայն, չնայած անցած տարիների շինարարություններին և խոստումներին, Գյումրիում անօթևան են դեռ 4.000 ընտանիք, Գյումրիում յուրաքանչյուր երկրորդն աղքատ է:
Այս ծայրահեղ ծանր պայմաններում ապրում են հազարավոր երեխաներ, ծերեր, թոշակառուներ և հաշմանդամներ: Անհնար է մեկ ֆոտոշարքով ներկայացնել բոլոր այն դաժան պայմանները, որոնցում ապրում են այս մարդիկ:
Արդեն երկրորդ անգամ կազմակերպում ենք «Ամոթի Օր» բողոքի լուսանկարչական շարքի ցուցադրություն Գյումրու անօթևան ընտանիքների մասին: Առաջին մասը՝ այստեղ։
Երկրաշարժի 26-րդ տարելիցին` դեկտեմբերի 7-ին՝ 11:41-ին, PAN Photo գործակալության կայքում, Antivirus հաղորդաշարի ֆեյսբուքյան էջում, Asparez.am, Blognews.am, shamshyan.com կայքերում ներկայացնելու ենք 26 լուսանկարների շարք, որոնցում պատկերված են անմարդկային պայմաններում իրենց գոյությունը պահպանող գյումրեցի ընտանիքներ:
Այս անգամ որոշել ենք այս ցուցադրությունը զուգորդել դրամահավաքով և հանգանակությամբ: Դիմում ենք բոլոր նրանց, ովքեր հնարավորություն և ցանկություն ունեն դրամական օժանդակություն ցուցաբերել այս ընտանիքներին` անել այդ: Հանգանակված ամբողջ գումարը բաշխվելու է դեկտեմբերի 7-ին հրապարակվող լուսանկարներում պատկերված 26 ընտանիքներին:
Հանգանակությունն ընթանալու է 2014 թվականի դեկտեմբերի 7-ից 17-ը:
Այս նպատակով բանկային հաշիվ է բացվել Ամերիաբանկում՝ հայտնի բլոգեր և տեղեկատվության անվտանգության փորձագետ Սամվել Մարտիրոսյանի անունով. 157000 30830 20400, ArCa համակարգում` 905119 02000 95691:
Հանգանակված և շահառուներին հասցված դրամական միջոցների մասին կլինեն պարբերական հանրային հաշվետվություններ: Դրամահավաքի, լուսանկարների շարքի, դրամը շահառուներին հասցնելու և որևէ այլ աշխատանքի համար հանգանակված միջոցներից ոչինչ չի ծախսվելու:
Հարգելի հայրենակիցներ, ձեր նվիրատվությունները կարող են փրկել այս մարդկանց, ձեր աջակցության շնորհիվ կթեթևացնեք այս ընտանիքների հոգսը նոր տարվա շեմին:
Խնդրում ենք բոլոր սրտացավ մարդկանց տարածել այս իրազեկումը, լուսանկարները և նեղություն կրել` մոտակա բանկում դրամ նվիրաբերել այս գործին, թեկուզ` 1 դոլար կամ 1.000 դրամ:
Լուսանկարներն ամբողջ մեծությամբ (7360x4912px) տեսնելու համար սեղմեք դրանց վրա։
Լուսանկարները՝ Hayk Barseghyan Photography
