Armtimes.com-ը գրում է.
Ամերիկյան Cinicinnati Children’s Hospital Medical Centre-ում կատարված հետազոտություններ պարզել են, որ դրամարկղերում եւ բանկոմատներում տրվող կտրոնները վտանգ են ներկայացնում մարդկանց առողջության վրա:
Այդ հետազոտությունները ցույց են տվել, որ նման կտրոնների թղթի բաղադրության մեջ մեծ է բիսֆենոլ A պլաստիֆիկատորի պարունակությունը: Այս քիմիական նյութը ներառում է թունավոր տարրեր:
Կատարված փորձերի ընթացքում պարզվել է, որ բիսֆենոլ A-ն թափանցում է մարդու օրգանիզմ սովորական շփման միջոցով: Ընդ որում, այն մարդկանց մոտ, ովքեր առօրյայում քիչ են առնչվում նման կտրոնների հետ, թույնի պարունակությունը օրգանիզմում շատ չնչին կարող է լինել, իսկ նրանք, ովքեր անընդհատ գործ ունեն թղթի այդ կտորների հետ` հնարավոր է հետագայում ունենան բարդություններ:
Գիտնականները ապացուցել են, որ բիսֆենոլ A-ի բարձր պարունակություն օրգանիզմում կարող է հանգեցնել անպտղության, բացասական ազդել երեխաների ուղեղի զարգացման վրա եւ այլն:
Չնայած այս ամենին, անհրաժեշտ են դեռ երկար ուսումնասիրություններ, որպեսզի պարզ դառնա, թե որքանով է կտրոններում պարունակվող բիսֆենոլ A-ի քանակությունը իրապես սպառնում մարդկանց առողջությանը:
Նշենք, որ մամուլում պարբերաբար հայտնվում հաղորդագրություններ`բիսֆենոլ A պարունակող մանկական խաղալիքների եւ պարագաների վաճառքի արգելքի մասին:
