Lragir.am-ը գրում է.
Վրաստանի նախկին նախագահ Միխաիլ Սաակաշվիլին, ով վերջին ամիսներին աշխատում է ԱՄՆ-ում, կապ է պահում նախկին իշխող «Ազգային միացյալ շարժում» կուսակցության հետ, Ինտերֆաքսին ասել է կուսակցության պատգամավորներից Դավիդ Դարչիաշվիլին:
«Սաակաշվիլին մշտապես կապի մեջ է մեր կուսակցության ղեկավարության հետ և տեղյակ է Վրաստանում տեղի ունեցող իրադարձություններին: Միևնույն ժամանակ, այս փուլում նա չի միջամտում կուսակցության գործունեությանը՝ նրա ղեկավարությանը գործողությունների լիակատար ազատություն տալով»,- ասել է Դարչիաշվիլին:
Պատգամավորը համաձայն չէ այն տեսակետին, որ Սաակաշվիլին մշտապես հեռացել է Վրաստանից: «Կարծում եմ, որ նա անպայման կվերադառնա և կմտնի քաղաքական կյանք, սակայն չեմ կարող ասել, թե դա երբ կլինի»:
Տեղեկացնենք, որ ներկայում Սաակաշվիլին դասավանդում է Ֆլեթչերի իրավունքի և դիվանագիտության դպրոցում: Պայմանագիրը կնքված է մեկ տարով:
