Մանկության կտավում... (Գրական անկյուն)

Մանկության թանձրաթավ կտավում` իմ շքեղ, 
Հորդառատ գույների շքերթ է, կառնավալ, 
Ամառվա մրգակախ, մեղրածոր այգիներ... 
Դե, մեզ էլ մնում էր գնալ ու գողանալ: 
Բոշաներ` փոշեմաշկ, դուրս եկած մեծ ճամփա, 
Չարչիներ` մատներին մանրածախ մաստակներ, 
Գնչուներ` խոստացող ափի մեջ ապագա, 
Աշխարհներ որոնող ու մի պտղունց սեր: 
Գյուղ բերված առաջին հնդկական կինոյի 
Մեկ` հավի շեկ ձվով ձեռք բերված տոմսակներ, 
Եվ դանակ ու մկրատ սրելու առիթով, 
Հեծանիվ-խարտոցով` մի բանվոր ընկեր: 
Կուժն ուսած աղջիկներ` աղբյուրում սառնորակ, 
Կարպետի հաստոցներ, յափնջով հովիվներ, 
Բակերում` լարախաղ, տատիկի ճախարակ, 
Արոտից տուն դարձող այծառաջ հոտեր: 
Մանկության ոսկեմաղ անձրևոտ իմ օրեր, 
Որ հիմա ջերմաթել անցյալիս կտավում 
Իմ հոգուն պատմում եք հիասքանչ հեքիաթներ, 
Եվ կյանքը, կարծես, իմաստավորում...

Դավիթ Վանյան 27.07.2013թ.