Զախարովան անդրադարձել է Փաշինյանի և Ալիևի ծանոթությանը
15:45 , 15 հունիս, 2018Yerkir.am-ը գրում է.
ՌԴ ԱԳՆ պաշտոնական ներկայացուցիչ Մարիա Զախարովան ավանդական ճեպազրույցի ժամանակ անդրադարձել է ՀՀ վարչապետ Նիկոլ Փաշինյանի և Ադրբեջանի նախագահ Իլհամ Ալիևի` ՌԴ-ում երեկ կայացած ծանոթությանը և պատասխանել հարցին` արդյո՞ք այդ հանդիպումը կարող է խթան հանդիսանալ բանակցային գործընթացի ակտիվացման համար:
«Ինձ թվում է, որ պետք չէ շփոթել ձևաչափերը: Կա շփում պետությունների ղեկավարների միջև, որը լինում երկկողմ, բազմակողմ: Եվ կա խնդիր, որն իր լուծման ձևաչափը ունի»,- ասել է նա:
Զախարովայի խոսքով` բարենպաստ մթնոլորտի ստեղծումը միայն նպաստում է բանակցային գործընթացի առաջխաղացմանը: «Ոչ միայն նպաստում է, այլև այդ խնդրի լուծման կարևորագույն գրավականն է: Սակայն ևս մեկ անգամ կրկնեմ` դրանք տարբեր ձևաչափեր են»,- ասել է նա:
Հիշեցնենք, որ երեկ ՌԴ նախագահ Վլադիմիր Պուտինը ծանոթացրել է ՀՀ վարչապետ Նիկոլ Փաշինյանին Ադրբեջանի նախագահ Իլհամ Ալիևի հետ: Նրանք ՌԴ էին ժամանել` ֆուտբոլի աշխարհի առաջնության բացմանը մասնակցելու: Քննարկումներ նրանց միջև չեն եղել, տեղի է ունեցել միայն ծանոթության արարողություն, որի մասին հայտնել էր Փաշինյանը: