Մոդել և դերասանուհի Իլոնա Նուրիբեկյանն, ով Ինստագրամում այս պահին ունի ավելի քան 128 հազար հետևորդ, որոշակիորեն նաև դարձել է նորաձևություն չափանիշ ու ճաշակ թելադրող հասարակության մի հատվածի համար, ովքեր հետևում են նրան ու փորձում կրկնօրինակել: BlogNews.am-ն Իլոնայի հետ զրուցել է նորաձևության, սեփական ոճն ընդգծելու, էքսպերիմենտների ու հագուստի նախընտրությունների մասին:
Նորաձևությունն Իլոնան նմանեցնում է խաղի, որտեղ մարդիկ կարող են երևակայել առանց սահմանների ու սահմանափակումների, անձնավորել իրենց ու ներկայանալ յուրօրինակ կերպարով: Տարօրինակ է, բայց դերասանուհին էքսպերիմենտների սիրահար չէ:
Պարզվում է՝ Իլոնան առհասարակ բրենդամոլ էլ չէ ու հագուստի նախընտրությունների հարցում բավականին զուսպ է. «Ընտրում եմ այն, ինչն ինձ հարմար է: Դա առաջնային պայմանն է, հետո նոր՝ գեղեցիկ․ և կապ չունի, թե որտեղ է վաճառվում: Սիրում եմ տարօրինակ բաներ, այսինքն՝ այն, ինչը ստանդարտից դուրս է: Այդ հագուստն ինձ միանշանակ կգրավի, որովհետև դա բոլորը չէ, որ կկրեն: Այդպիսի հագուստն ավելի մեծ ոգևորվածությամբ ու սիրով կգնեմ ես»:
Իլոնայի զգեստապահարանը միատոն չէ, այնտեղ գերակշռում են վառ գույները, ինչն էլ ընդգծում է դերասանուհու անհատականությունը. «Սպիտակը, դեղինը, կարմիրն ու մանուշակագույնն իմ ամենասիրելի գույներն են: Բացի նրանից, որ դրանք ընդգծում են իմ անհատականությունը, ես գույները շատ եմ սիրում ու հատկապես հագուստի մեջ հաճախ համարձակ համադրություններ եմ անում»:
Իլոնան ևս պատկանում է աղջիկների այն թվին, ովքեր զգեստապահարանը կարող են բացել ու տեսնել, որ հագնելու բան չունեն. «Եթե անկեղծ, տանն արդեն տեղ չունեմ հագուստներիս համար: Բոլոր պահարաններս լցված են ու հիմա զբաղված եմ հենց այդ հարցով, որտեղ տեղավորել նոր իրերը: Բայց այո, ես պատկանում եմ այն մարդկանց թվին, ովքեր կարծում են, որ հագուստը երբեք շատ չի լինում»,- նշում է դերասանուհին և հավելում, որ իր հագուստները նվիրել չի սիրում․ այն իրերը, որոնք այլևս չի օգտագործում, նախընտրում է դեն նետել, քան նվիրել, քանի որ իր հագուստը չի կարող ուրիշի հագին տեսնել:
Իլոնան դժվարանում է ասել՝ ամսական որքան գումար է տրամադրում զգեստապահարանը թարմացնելու համար. «Հնարավոր է՝ հիմա էլ դուրս գամ փողոց ու խանութի կողքով անցնելիս մանեկենի վրա գեղեցիկ հագուստ տեսնեմ ու գնեմ: Շաբաթվա կամ ամսվա հատուկ օրեր չկան, որ տրամադրում եմ շոփինգին: Ես այն մարդկանց տեսակին եմ պատկանում, որ մտնում են խանութ մի բան գնելու ու մի քանի բան էլ ավել առած դուրս են գալիս: Ամսվա կտրվածքով, եթե չչափազանցնեմ, մի 20 օր հաստատ խանութներում եմ լինում»:
Իլոնայի համար պարտադիր պայման չէ սեզոնի թրենդներով զգեստապահարանը համալրելը, բայց ինչը, որ իրեն կարող է դուր գալ, հենց նույն րոպեին է ձեռք բերում. «Նորաձևության միտումներին մոլի չեմ հետևում։ Եթե ինձ դուր չգային, օրինակ, պատռված ջինսերը, ինձ համար բացարձակ միևնույն է՝ կլինեին դրանք ակտուալ, թե ոչ, միևնույն է, չէի կրի և հակառակը: Այս սեզոնի թրենդը սուր ակնոցներն, որոնք ինձ շատ են դուր գալիս: Նորաձև երևալու խնդիր չունեմ: Հավատացեք, տարբեր ոճերի հագուստ համադրելով ավելի նորաձև կարելի է լինել, քան կուրորեն թրենդներին հետևելով»:
Իլոնան իրեն մեկ ոճում դժվարանում է պատկերացել. «Թե՛ դասական, թե՛ սպորտային և թե՛ քեժլ ոճերում էլ ինձ տեսնում եմ: Դեռ նախընտրած ոճ չունեմ ու կարծում եմ՝ յուրաքանչուր աղջիկ զգեստապահարանն էլ պետք է բազմազան լինի ու ընտրության հնարավորություն»,- նշում է Իլոնան ու ավելացնում, որ հագուստների ընտրությամբ անձամբ է զբաղվում, համադրում անհամադրելին: Ոճաբանի խորհրդատվության կարիքը չի զգում. «Կարծում եմ՝ ճիշտը դա է, կարող են քեզ կողքից խորհուրդ տալ, ասել՝ սա լավ է կամ վատ, բայց քո ոճը, այսինքն՝ այն, ինչը պետք է հագնես, պետք է դու ընտրես: Ինքդ պետք է գնաս խանութ ու հավանես այն, ինչը պետք է հագնես»:
Ինստագրամում 128 հազար հետևորդ ունեցող դերասանուհին նաև իր նախընտրություններով որոշակի ճաշակ է թելադրում, որոշները փորձում են կրկնօրինակել նրան: Որքան էլ զարմանալի է, Իլոնան անձամբ որևէ հայտնի նորաձևության բլոգի չի հետևում. «Ճիշտն ասած՝ չեմ հետևում ոչ մի հայտնի մարդու, ում ես անձամբ փորձում եմ նմանվել ու ինչ-որ էլեմենտներ, հագուստի տարրեր վերցնել ու օգտագործել: Պարզապես հետևում եմ նորաձևության տենդենցներին»:
Իլոնայի համար հագուստի ու աքսեսուարների մեջ առաջնայինը գլխարկն է, որը լրացնում է նրա կերպարը: Ասում է՝ կարող է անդադար գլխարկ գնել ու չհոգնել դրանից. «Գլխարկներ շատ եմ սիրում ու միշտ կրում եմ, բայց կա այսպիսի մի հետաքրքիր փաստ, որ ես սովորաբար կորցնում եմ դրանք: Կարող է իմ այսօրվա գնած գլխարկը, վաղը կորցնեմ ու չհասկանամ՝ ինչպես դա եղավ:) Բայց աքսեսուարներ միշտ չէ, որ օգտագործում եմ բոլոր հագուստներիս հետ: Սիրում եմ վզնոցներ ու ժամացույցներ»:
Շոփինգը, ինչպես շատ աղջիկների համար, Իլոնայի համար ևս սթրեսից դուրս գալու լավագույն միջոցն է: Դրանից դերասանուհին լիցքաթափվում է. «Գնումներն ինձ համար հաճելի զբաղմունք է, որից ես երբեք չեմ հոգնի: Գնումների գնում եմ պարտադիր միայնակ, չեմ սիրում, որ ինչ-որ մեկն ինձ ընկերակցում է: Նրանք ինձ ավելի շատ կարող են խանգարել իրենց խորհուրդներով, քան օգնել»:
Նյութը՝ Էմմա Վարդանյանի