ՇՊՀ-ում աշխատանքից ազատվել են Գագիկ Համբարյանն ու Հովհաննես Խորիկյանը
18:10 , 15 մարտ, 2018Armtimes.com-ը գրում է.
Նոր զարգացումներ Շիրակի պետական համալսարանում: Ռեկտոր Սահակ Մինասյանի հրամանով այսօր աշխատանքից ազատվել են համալսարանի դասախոսներ Գագիկ Համբարյանն ու Հովհաննես Խորիկյանը: Երկուսն էլ տեւական ժամանակ հնարավոր բոլոր ատյաններում, նաեւ սոցցանցում քննադատում էին համալսարանի ռեկտոր Սահակ Մինասյանի գործողությունները, դրանք որակելով կամայականություն եւ ապօրինություն: Հովհաննես Խորիկյանն անգամ մեկօրյա հացադուլ էր հայտարարել:
Երկու դասախոսների համար ռեկտորի կողմից ստորագրված փաստաթղթում որպես ազատման հիմք նշվում է Աշխատանքային օրենսգրքի 113-րդ հոդվածի 1-ի մասի 6-րդ կետը (աշխատողի նկատմամբ վստահությունը կորցնելը) և 122-րդ հոդվածի 2-րդ կետը (ուսումնադաստիարակչական գործառույթներ իրականացնող աշխատողը թույլ է տվել տվյալ աշխատանքը շարունակելու հետ անհամատեղելի արարք)։
Աշխատանքային պայմանագիրը լուծարելու հիմք է հանդիսացել ՇՊՀ Գիտական խորհրդի, ինչպես նաեւ նույն խորհրդի որոշմամբ ստեղծված էթիկայի հանձնաժողովի որոշումները: Որոշման մասին դասախոսներին նախապես տեղյակ չեն պահել: Որոշումը երկուսի համար էլ անակնկալ է եղել: Այս մասին դասախոսները խոստանում են խոսել մի փոքր ուշ: