Ալոեի հյութ. ինչպե՞ս և ինչի՞ համար օգտագործել

Ալոեի հյութը իրավամբ համարվում է ձեռքի, դեմքի, գլխի մաշկի խնամքի լավագույն միջոցներից մեկը: Այն սնուցում, առողջացնում և երիտասարդացնում է մաշկը: Թե ինչ հատկություններով է օժտված ալոեի հյութը, ինչպես այն ճիշտ պատրաստել, ինչպես նաև ամենատարածված և օգտակար բաղադրատոմսերը՝ ստորև:

Ալոեի օգտակար հատկությունները

• Ալոեի հյութը պարունակում է բազմաթիվ վիտամիններ և հանքանյութեր: Դրանցից հիմնականներն են՝ A, B1, B2, B3, B12, C վիտամինները, ֆոլաթթուն, երկաթը, մագնեզիումը, նատրիումը, կալիումը, ցինկը, քրոմը, պղինձը, ամինաթթուները, էնզիմները:
• Բացի դրանից՝ այս դեղաբույսն օժտված է ցավազրկող, վերականգնող և բակտերիացիդ հատկություններով: Այդ պատճառով էլ այն լայնորեն օգտագործվում է նաև բժշկության մեջ:
• Ալոեի հյութն անփոխարինելի միջոց է շլակներն օրգանիզմից դուրս բերելու համար՝ շնորհիվ աղիների պերիստալտիկան լավացնող տարրերի:
• Ալոեի հյութն ունակ է ամրապնդելու իմունիտետը, դիմադրել վիրուսային ինֆեկցիաներին և բարձրացնել օրգանիզմի պաշտպանական ֆունկցիաները:
• Այս դեղաբույսն օժտված է նաև արյունահոսությունը կանգնեցնող և վերքերը լավացնող հատկություններով:
• Ալոեի հյութը գրգռում է ախորժակը, բարձրացնում է նաև օրգանիզմի տոնուսը:
• Ալոեի հյութը շատ տարածված է ժողովրդական բժշկության և կոսմետոլոգիայի մեջ, քանի որ օժտված է խոնավեցնող հատկություններով, մաշկը դարձնում է էլաստիկ և ձիգ և ունակ է մաքրելու դեմքի բշտիկները:

Ալոեի հյութի պատրաստումը տնային պայմաններում․

• Ընտրիր ալոեի այն տերևները, որոնց ծայրերը թեթևակի չորացել են: Ցանկալի է կտրել ներքևի և միջին հատվածի տերևները:
• Կտրված տերևները պետք է օգտագործվեն ոչ ուշ, քան 3 ժամվա ընթացքում, այլապես նրա օգտակար հատկությունները կկորսվեն:
• Ալոեի հյութ կարելի է ստանալ ձեռքերով այն ճզմելով տերևներից կամ մսաղացով աղալու ու թանզիֆով անցկացնելու միջոցով:
• Ալոեի հյութը պատրաստելուց հետո այն սառնարանում կարելի է պահել ոչ ավելի, քան 3 օր, այլապես նրա օգտակար հատկությունները կվերանան: Այն ավելի երկար պահելու համար պատրաստում են սպիրտային հիմքով թուրմ՝ 2:1 հարաբերությամբ:
• Կարելի է նաև ալոեի հյութը սառեցնել սառույցի համար նախատեսված տարաների մեջ, ապա դրանք օգտագործել կոսմետիկ նպատակներով: Կամ կարելի է քսուք պատրաստել՝ այն խառնելով վազելինի կամ լանոլինի հետ:

Ալոեի հյութի՝ գեղարարական նպատակներով գործածությունը և մաշկի խնամքը

Ալոեի հյութը բավականին հաճախ կարելի է հանդիպել տարատեսակ քսուքների, շամպունների, մաքրող միջոցների բաղադրության մեջ: Այս հիանալի բույսը խնամում է ձեռքի, դեմքի և գլխի բոլոր տեսակի մաշկերը:

• խոնավեցնում է դեմքի չոր մաշկը
• հանում է բորբոքված մաշկի այտուցվածությունը
• բարձրացնում է մաշկի տոնուսը և հարթեցնում է կնճիռները
• նպաստում է ցելյուլիտից ազատվելուն
• մաքրում է խնդրահարույց ճարպոտ մաշկը և պայքարում բշտիկների դեմ
• գլխի մաշկը բուժում է թեփից
• կանխում է մազաթափությունը

Ձեռքի մաշկի խոնավեցման համար

Խառնիր ալոեի հյութը ձիթայուղի հետ 1:1 հարաբերակցությամբ և քնելուց առաջ քսիր ձեռքիդ մաշկին, ապա դիր բամբակե ձեռնոց: Առավոտյան մերսիր ձեռքիդ մաշկը:

Դեմքի նորմալ մաշկի խնամքի համար

Նույն չափաբաժիններով խառնիր ալոեի հյութը և մեղրը, քսիր դեմքիդ մաշկին և թող մնա 5-7 րոպե, ապա լվա տաք ջրով:

Դեմքի չոր մաշկի խնամքի համար

Ալոեի հյութի, վարսակի ալյուրի, թխկու մեղրի և ձիթապտղի յուղի հավասար քանակությամբ վերցված մասերը խառնել մինչև խիտ շիլա դառնալը, քսել դեմքին և պահել 10-15 րոպե, ապա լվանալ տաք ջրով:

Դեմքի ճարպոտ մաշկի խնամքի համար

Պետք է վերցնել ալոեի հյութ և կիտրոն հավասար քանակությամբ, խառնել և հավասար, բարակ շերտով քսել դեմքին, ապա մաքրել տոնիկով:

Դեմքի կնճիռների դեմ

Ալոեի 2 խոշոր տերև մանրացնել, ավելացնել մեկ բաժակ ջուր, սառեցնել սառույցի համար նախատեսված կաղապարների մեջ և ամեն օր՝ առավոտյան, այդ խորանարդիկով տրորել դեմքը:

Գլխամաշկի խնամքի համար

Օգտակար նյութերով գլխամաշկը սնուցելու համար գլուխը լվանալուց առաջ 1 ճաշի գդալ ալոեի թարմ քամած հյութը պետք է ավելացնել շամպունին ու դրանով լվանալ գլուխը: