Մեկ տարի առաջ՝ ԱՄՆ մեկնելուց հետո, Արմինկան առաջին անգամ վերադառնում է երգարվեստ: Նա գեղեցիկ զուգերգ է պատրաստել Նորոյի հետ, որի պրեմիերան նախատեսված է նոյեմբերի 28-ին: Մինչ այդ երգչուհին BlogNews.am-ին պատմել է Նորոյի հետ գործակցության ու տեսահոլովակի նկարահանումների մասին:
«Այս երգով ու տեսահոլովակով ես ազդարարում եմ իմ վերադարձը: Դուետի նախաձեռնությունը Նորոյինն էր, ինչի համար ես միայն ուրախ եմ»:
Տեսահոլովակը նկարահանվել է «Սեր ու տարիներ» երգի հիման վրա, Մալուբայի շատ շքեղ ու պատմական մի տանը, որտեղ տեսահոլովակ ունի նկարահանած նաև Բեյոնսեն: Երաժշտության հեղինակը Ռիչարդ Մադլենյանն է, խոսքերը գրել է Ավետ Բարսեղյանը, գործիքավորումը կատարել է Artur & Bina Production-ը։ Տեսահոլովակի ռեժիսորն Արթուր Մանուկյանն է, օպերատորը` Գևորգ Ճուղուլյանը։
«Նկարահանումների ընթացքը հեշտ էր ու հաճելի, որովհետև յուրաքանչյուրը զբաղված էր իր գործով: Ցանկացած տեղ նկարահանում իրագործելը դառնում է հեշտ, եթե կողքիդ կա պրոֆեսիոնալ թիմ: Իսկ մենք, փառք Աստծո, ունեինք այդ թիմը»:
Արմինկայի խոսքով՝ երգը նախատեսված է հայ ունկնդրի համար՝ անկախ աշխարհագրական դիրքից. «Երգը պատմում է մի սիրո մասին, որն ունի երկար տարիների ընթացք: Այդ ժամանակահատվածում հաղթահարվում ու ներվում են բոլոր խնդիրները սիրո ու կրքի ուժգնության շնորհիվ»:
Տեսահոլովակում երգչուհին կրում է իր իսկ մոդելավորած հագուստը՝ «Արմինկա» բրենդից, համագործակցել է նաև երկու այլ հայտնի դիզայներական տների հետ: Արմինական միաժամանակ աշխատում է բրենդի տարածման ու զարգացման համար՝ շարունակելով գործունեությունը որպես դիզայներ. «Փոքրիկ նոր հավաքածու եմ արել։ Այս անգամ էլ էքսկլյուզիվ հավաքածու է. ամեն հագուստից մեկ օրինակ եմ ներկայացրել: Շուտով վաճառքում կլինի նոր հավաքածուն»:
Տեսահոլովակի շնորհանդեսն ԱՄՆ-ում կազդարարվի երեկույթով:
Նյութը՝ Էմմա Վարդանյանի