Արդյունաբերությունը կայուն աճում է

ԱՎԾ հրապարակած ՀՀ սոցիալ-տնտեսական վիճակը բնութագրող ընթացիկ-օպերատիվ ամփոփմամբ ստացված նախնական հիմնական մակրոտնտեսական ցուցանիշներըի համաձայն՝ 2016 թվականի տնտեսական ակտիվությունը նախորդ տարվա համեմատությամբ աճել է 0.5 տոկոսով:
Տնտեսական աճի ապահովմանը էապես նպաստել է ծառայությունների մատուցման ոլորտը՝ 7.1 տոկոս աճի շնորհիվ: Արդյունաբերությունը ապահովել է 6.7 տոկոս աճ և տարվա կտրվածքով կազմել է 1 429 044.0 մլն դրամ: Պետք է նշենք, որ արդյունաբերական արտադրանքի գների ինդեքսը երկարատև անկումից հետո աճի միտում է գրանցել՝ 1.5 տոկոս, ինչը պայմանավորված է պղնձի միջազգային գների աճով: Վերջինս դրական ազդեցություն կթողնի Հայաստանի տնտեսության վրա:

Գյուղատնտեսության ոլորտի անկումը կազմում է 5.2 տոկոս, տարվա կտրվածքով ծավալը կազմում է ընդամենը 907 505.1 մլն դրամ: Ակնհայտ է, որ գյուղատնտեսական ոլորտում տիրող իրավիճակը բացասական ազդեցություն է ունենում ընդհանուր մակրոտնտեսական ցուցանիշների վրա, և անհրաժեշտ է վերջինններիս վերլուծության արդյունքում մշակել գյողատնտեսության զարգացման ռազմավարություն, որն իր մեջ կներառի արտադրողին աջակցելու. մրցունակ արտադրանք ստեղծոլու, արտադրական ծավալները մեծացնելու, ինչպես նաև առկա շուկաներում ամրապնդվելու և նորերը որոնելու հստակ մոտեցումներ:

Շինարարությունը անկումը շարունակական բնույթ է կրում, կազմում է 10.8 տոկոս:
Ներքին առևտրի շրջանառության աճը նախորդ տարվա նույն ժամանակահատվածի համեմատությամբ 1 տոկոս է և կազմում է 2 233 593.7 մլն դրամ: Աճի ցածր տեմպը պայմանավորված է տրանսֆերտների կրճատման արդյունքում բնակչության եկամուտների և սպառման վարքագծի փոփոխության հետ:
ԱՎԾ տվյալների համաձայն՝ 1.7 տոկոսով ավելացել է միջին ամսական աշխատավարձերը, իսկ սպառողական գների անկումը կազմել է 1.4 տոկոս:

Հուսադրող է արտաքին առևտրաշրջանառության ծավալների շարունակական աճը, որը նախորդ տարվա նույն ժամանակատվածի համեմատությամբ կազմել է 7.4 տոկոս, ապահովելով 2 436.6 մլրդ դրամ:

Նշենք, որ այդ հատվածի աշխուժացումը շարունակում է ապահովվել արտահանման ծավալների ավելացման շնորհիվ: Վերջինս պահպանել է դրական տենդենցը և աճը կազմել է 20 տոկոս՝ ապահովելով 855.9 մլրդ դրամ: Հատկանշական է, որ ներմուծման ցուցանիշը երկարատև անկումից հետո գրանցել է 1.6 տոկոսանոց աճ, ծավալները կազմել են 1 580.7 մլրդ դրամ:
Նշենք, որ Ֆինանսների նախարար Վարդան Արամյանի կանխատեսմամբ՝ 2016-ի արդյունքներով՝ իրական ՀՆԱ-ն կկազմի 0.5%` նախատեսված 2.2% աճի փոխարեն: Հայաստանի տնտեսությունը չէր կարող զերծ մնալ արտաքին աշխարհից ներթափանցող բացասական ազդեցություններից: 2016 թվականը նախարարը գնահատել էր որպես «ցնցումների վերջնակետ» իսկ 2017 թվականը՝ «վերականգնողական տարի»: Նախարարի կանխատեսմամբ՝ այս տարվա իրական աճը կլինի 3.2%: