Սերբիան սպառնացել է զորքեր ուղարկել Կոսովո
02:10 , 16 հունվար, 2017
Բելգրադն իր զորքերը կուղարկի Կոսովո այն դեպքում, եթե այնտեղ ապրող սերբ բնակչության համար սպառնալիք առաջանա ալբանացիների կողմից։ Այդ մասին հայտարարել է Սերբիայի նախագահ Տոմիսլավ Նիկոլիչը մասնակի ճանաչված պետության իշխանությունների հետ հարաբերությունների կտրուկ սրման ֆոնին՝ փոխանցում է RIA Novosti-ն։
«Եթե սպանեն սերբերին, ապա այո։ Եվ ոչ միայն բանակը, մենք բոլորս կգնանք։ Ես առաջինը կգնամ, ինձ համար դա առաջին անգամը չէ»,-հայտարարել է Նիկոլիչը ազգային անվտանգության հարցերով խորհրդի նիստից հետո։
Նախագահի խոսքով՝ Սերբիան չի ձգտում հակամարտության և չի ցանկանում հարձակվել, սակայն որպես պետություն սահմանադրությամբ պարտավոր է պաշտպանել իր քաղաքացիներին։
Սերբիայի և Կոսովոյի միջև հարաբերություններում ճգնաժամի նոր ալիքը առաջացել է, երբ երեկ Կոսովոյի ալբանացիները հրաժարվել են թողնել 1999 թվականից ի վեր առաջին ուղևորատար գնացքը, որը մեկնում էր Բելգրադից Կոսովսկա-Միտրովիցա։