Թրամփը Քլինթոնին առաջարկել է դեբատներից առաջ անցնել թմրանյութի թեստ
13:00 , 16 հոկտեմբեր, 2016
Հանրապետական կուսակցությունից ԱՄՆ նախագահի թեկնածու Դոնալդ Թրամփը հայտարարել է, որ և՛ ինքը, և՛ իր մրցակից Հիլարի Քլինթոնը հաջորդ հեռուստադեբատներից առաջ պետք է անցնեն արյան մեջ թմրանյութի առկայության թեստ: Այս մասին հաղորդում է BBC-ն:
Նյու Հեմփշիրում ընտրողների առջև ելույթ ունենալիս Թրամփը ենթադրել է, որ նախորդ դեբատներից առաջ Քլինթոնն ընդունել է ինչ-որ դեղամիջոց, որովհետև նրա խոսքով՝ սկզբում նա կարծես խմած լիներ, իսկ վերջում հազիվ կարողացավ հասնել մեքենային:
«Ես այնքան էլ չեմ հասկանում՝ ինչ է կատարվում: Նախորդ դեբատների սկզբում նրան կարծես ճոճում էին, իսկ վերջում նա այնպիսի տեսք ուներ՝ ասես խնդրում էր իջեցնել իրեն բեմից: Նա հազիվ կարողացավ ինքնուրույն հասնել մեքենային: Մենք մարզիկների նման ենք. չէ՞ որ նրանց ստիպում են թմրանյութի թեստ անցնել: Կարծում եմ՝ մենք նույնպես դեբատներից առաջ պետք է այդ թեստը անցնենք»,- ասել է Թրամփը: