Ջավախքցիները ամեն ընտրության հույս են փայփայում, որ իշխանության եկածը կլուծի իրենց հուզող խնդիրները
11:23 , 22 սեպտեմբեր, 2016
Վրաստանում պառլամենտական ընտրություններին հաշված օրեր են մնացել։ Ջավախքցիները ընտրությունից ընտրություն հույս են փայփայում, որ իշխանության ղեկը ստանձնողը կլուծի իրենց հուզող ու կարևոր խնդիրները։ Վրաստանում իշխանափոխություն տեղի է ունեցել ոչ մեկ անգամ։ Սակայն ժամանակը ցույց տվեց , որ ոչ մի իշխանություն պատրաստ չէ ու ցանկություն չունի լուծելու այնպիսի խնդիրներ, ինչպիսիք են Սամցխե-Ջավախքում հայոց լեզվի կարգավիճակի հարցը, հայկական դպրոցներում հայոց պատմության դասավանդման, հայատառ գրականության՝ Վրաստան մուտքի արգելքի հարցերը և այլն։ Հենց այդ պատճառով ջավախքցու համար գրեթե նշանակություն չունի, թե ով կգա իշխանության, քանի որ նմանատիպ հարցերով ի սկզբանե զբաղվել են Վրաստանի ուժային կառույցները, և 25 տարվա ընթացքում վերջիններիս դիրքորոշումը երբեք չի փոխվել։ Հայաստանի իշխանությունների՝ այս հարցում անհետևողական գործելաոճն ու վերաբերմունքը միայն նպաստում է նրան, որ վերոնշյալ խնդիրներն այդպես էլ մնան առկախված։ Հայոս Քարթլոս գաումառջոս։ Ու վերջ. ցրվեցինք տներով։