Խորհուրդներ ինչպես տապակել կարտոֆիլը

Տապակած կարտոֆիլը թե մեծերի և թե փոքրերի սիրելի ուտեստներից է։ Թվում է` կարտոֆիլ տապակելու մեջ ոչ մի բարդություն չկա, սակայն ոչ բոլորն են կարողանում պատրաստել ախորժելի և ոսկեգույն կարտոֆիլ: Որպեսզի կարտոֆիլը տապակելու ընթացքում խյուսի չվերածվի, անհրաժեշտ է հետևել մի քանի պարզ կանոնների.

Խորհուրդներ.

• Ավելորդ օսլայից ազատվելու համար, կեղևազատված կարտոֆիլը պետք է սառը ջրով լի ամանի մեջ լցնել, ինչպես նաև մի քանի անգամ լվանալ հոսող ջրի տակ:
• Սովորաբար կարտոֆիլը բարակ ձողիկներով են կտրատում: Պետք է կտորները 1 սմ-ից լայն չլինեն, քանի որ շատ բարակ ձողիկներով կտրատած կարտոֆիլը չոր է ստացվում, իսկ հաստ կտորներովը` լավ չի տապակվում։
• Տապակելուց առաջ կարտոֆիլը պետք է չորացնել (կարելի է սրբիչի վրա դնել)։
• Կարտոֆիլը լավ կլինի փոքր չափաբաժիններով տապակել՝ միջին ուժեղության կրակի վրա։ Չուգունե կաթսաները կամ թավաները, կարտոֆիլ տապակելու համար, ամենահարմար տարբերակն են։
  
• Կարտոֆիլը պետք է բուսայուղապատ շիկացած թավայի մեջ տապակել։ Շատ համեղ է ստացվում նաև խոզի ճարպի մեջ տապակված կարտոֆիլը: Այն բանից հետո, երբ խոզի ճարպից յուղը հալչի և դուրս հոսի պետք է ավելացնել կարտոֆիլը: Եթե կարտոֆիլը սոխով և սխտորով եք տապակելու, ապա դրանք պետք է պատրաստ լինելուց 5-7 րոպե առաջ ավելացնել, որպեսզի չվառվեն։ Շատ համեղ է ստացվում նաև կարտոֆիլը տապակել սնկով: Սունկն ավելի լավ է նախապես տապակել` կարտոֆիլից առանձին, այնուհետև կարտոֆիլը պատրաստ լինելուց 10-15 րոպե առաջ ավելացնել։
• Կարտոֆիլը պետք չէ անմիջապես խառնել։ Պետք է սպասել մինչ ոսկեգույն կեղև առաջանա, այնուհետև թիակով խառնել ընդամենը 3-4 անգամ։
• Կարտոֆիլն աղով պետք է համեմել վերջում՝ պատրաստ լինելուց 3-5 րոպե առաջ, քանի որ աղը շուտ լցնելու դեպքում, կարտոֆիլի ջուրը դուրս է գալիս և այն փխլվում է:
• Կարտոֆիլը տապակելուց հետո ցանկալի է այն ծածկել կափարիչով: