Օրվա բաղադրատոմսը. Պատրաստում ենք շոկոլադե համեղ էլկեր (Photo)
14:27 , 7 փետրվար, 2016Բաղադրիչներ
- Խմորի համար՝
- ջուր – 200 մլ
- կարագ – 100 գր
- ալյուր – 150 գր
- ձու – 4 հատ
- աղ – 1/4 թ/գդ
- շաքարավազ – 1/4 թ/գդ
- Կրեմի համար՝
- ձու – 2 հատ (սպիտակուց)
- շաքարավազ – 90 գր
- ջուր – 30 մլ
- կարագ – 275 գր(սենյակային ջերմաստիճանի)
- Ջնարակի համար՝
- շոկոլադ սև – 100 գր
- սերուցք 30-35% յուղայնությամբ – 80 մլ
Պատրաստման եղանակ
Ջուրը, աղը, շաքարավազը և կտրատած կարագը կաթսայի մեջ ենք լցնում։
Դնում ենք միջին ուժեղության կրակի վրա`մինչև կարագը լուծվի։ Կրակի վրայից հանում ենք և ալյուր խառնում։
Այնուհետև դնում ենք կրակի վրա և մոտ 2-3 րոպե անընդհատ խառնում` մինչև խմորը գնդվի և կեղև կապի։
Կաթսան կրակի վրայից հանում ենք և խմորը տեղափոխում մեկ այլ տարայի մեջ։ Ձուն հատ առ հատ ավելացնում ենք խմորին և յուրաքանչյուրից հետո թիակով լավ խառնում։ Վերցնում ենք հարիչը և ամենացածր արագության վրա հարում։ Անընդհատ հետևում ենք, որ խմորը շատ չջրիկանա։ Ապահովության համար վերջին ձուն պատառաքաղով ենք տրորում և մաս առ մաս ենք ավելացնում։ Խմորը պետք է հարթ և փայլուն լինի։
Խմորը լցնում ենք խոհարարական պարկի մեջ և 7-8 սմ երկարությամբ և 2-5 սմ լայնությամբ էկլերներ ենք շարում յուղաթղթով պատված տապակի մեջ։
Տապակը տեղափոխում ենք մինչև 200 աստիճան տաքացրած ջեռոցի մեջ և մոտ 30 րոպե թխում ` մինչև ոսկեգույն երանգ ստանանք։
Պատրաստում ենք սերուցքային կրեմը։ 50 գր շաքարավազն ու ջուրը լցնում ենք կաթսայի մեջ։ Մնացած շաքարավազը խառնում ենք սպիտակուցների հետ և հարիչով հարում մինչև թեթև փրփրի։
Շաքարավազով և ջրով կաթսան դնում ենք միջին ուժեղության կրակի վրա, հասցնում ենք եռման աստիճանի և եփում ենք, մինչև խառնուրդը 116-118 աստիճանի հասնի (ջերմաստիճանը չափելու համար կարամելի համար նախատեսված ջերմաչափեր կան)։ Իսկ, եթե ջերմաչափ չունենք, կարող ենք օշարակը կաթեցնել սառը ջրով լի բաժակի մեջ, եթե կաթիլը սառելուց փափուկ գնդիկ դառնա, ուրեմն այն պատրաստ է։ Բայց ջերմաչափն ավելի լավ միջոց է։
Օշարակը կրակի վրայից վերցնում ենք։ Շարունակում ենք սպիտակուցները հարել` այդ ընթացքում բարակ շիթով սկսում ենք տաք օշարակը լցնել։ Հարում ենք մինչև պինդ և փայլուն փրփուր ստանանք։ Զանգվածը մոտ 5 րոպե հարում ենք մինչև սենյակային ջերմաստիճանի դառնա ։ Այնուհետև սկսում ենք ոչ մեծ խորանարդիկներով կտրած կարագ ավելացնել (2-3 խորանարդիկ ենք գցում, ամեն գցելուց հետո փոքրիկ դադար ենք տալիս)։ Արդյունքում պետք է միասեռ, հարթ և փայլուն զանգված ստանանք։
Կրեմը ավելի լավ է պատրաստել օգտագործումից անմիջապես առաջ։ Պատրաստի սառած էկլերները երկարությամբ 2 մասի ենք բաժանում և կրեմով լցոնում։ Վերևից էկլերները երկրորդ կեսով ծածկում ենք ։
Պատրաստում ենք ջնարակը։
Շոկոլադը մանր կտրատում ենք։ Սերուցքը հասցնում ենք եռման աստիճանի և շոկոլադը լցնում ենք մեջը։ Խառնիչով խառնում ենք մինչև համասեռ զանգված ստանանք։
Էկլերները ջնարակապատում ենք. կարող ենք ջնարակը գդալով վրան լցնել, կարող ենք նաև էկլերները թաթախել ջնարակի մեջ։ Վերջին տարբերակում, պետք է էկլերները մի քիչ սառնարանում թողնենք, նոր թաթախենք ջնարակի մեջ:
Թողնում ենք, որ ջնարակը սառչի ու մատուցում ենք։
Որպեսզի էկլերները հաջող ստացվեն պետք է ձվերն ավելացնելու ընթացքում շատ լավ խառնել և հետևել որ, խմորը ճիշտ կազմության գա։ Թխվելու ընթացքում պետք է ջեռոցի դուռը չբացենք