Ֆրանսիայի հյուսիսային Կալե քաղաքում ներգաղթյալների ներկայության դեմ շաբաթ օրը տեղի ունեցած բողոքի ցույցը վերջացել է զանգվածային անկարգություններով: Ոստիկանությունը ձերբակալել է մոտ 20 մարդու:
Ինչպես հայտնել է Agence France-Presse-ը, ձերբակալվածների թվում է ֆրանսիական բրիգադի գեներալ Քրիստիան Պիկմալը, որն անցյալում եղել է արտասահմանյան լեգիոնի հրամանատար:
Դեռևս շաբաթվա կեսերին Ֆրանսիայի ՆԳ նախարար Բեռնար Կազնյովը նախազգուշացրել էր, որ «հասարակական կարգի խանգարմանն ուղղված ցանկացած ակցիա կցրվի»:
Սակայն դա չի խանգարել, որ քաղաքի կենտրոնում հավաքվեն մոտ 200 մարդ: Իրադրությունը շատ արագ վերահսկողությունից դուրս է եկել: Զանգվածային ծեծկռտուք թույլ չտալու համար ոստիկանությունը օգտագործել է արցունքաբեր գազ:
Ցույցի անցկացման վայրը պատահական չէ, որ դարձել է Կալե քաղաքը: Այնտեղ են գտնվում մոտ 4500-6000 անօրինական փախստականներ, որոնք պարբերաբար փորձում են որևէ ճանապարհով ընկնել Մեծ Բրիտանիա: