Ամենայն Հայոց Կաթողիկոսն ընդունել է հակառակորդի գնդակից հրազենային վնասվածք ստացած հոգևորականին

Tert.am-ը գրում է.

Սեպտեմբերի 4-ին Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսը Մայր Աթոռ Սուրբ Էջմիածնում ընդունել է սույն թվականի օգոստոսի 11-ին ԼՂՀ հյուսիս-արևելյան հատվածի զորամասերից մեկի ուղղությամբ հակառակորդի կողմից իրականացված հետախուզադիվերսիոն ներթափանցման փորձի հետևանքով գլխի հրազենային վնասվածք ստացած ՀՀ ԶՈՒ հոգևոր սպասավոր Բարեշնորհ Հովհաննես սարկավագ Գալստյանին` Հայոց բանակի հոգևոր առաջնորդ Գերաշնորհ Տ. Վրթանես եպիսկոպոս Աբրահամյանի ուղեկցությամբ. տեղեկացնում է Մայր Աթոռ Սբ Էջմիածնի տեղեկատվական համակարգը:

Հանդիպմանը Նորին Սրբությունն իր օրհնությունն է փոխանցել Հովհաննես սարկավագ Գալստյանին` շուտափույթ ապաքինում մաղթելով նրան:

Վեհափառ Հայրապետը, փառք տալով Երկնավորին, որ Տիրոջ ողորմությամբ կանխվել է Հովհաննես սարկավագի կյանքին սպառնացող վտանգը, շեշտել է, որ Հայ Եկեղեցու ամեն մի հավատացյալ և հոգևորական հպարտ է Հովհաննես սարկավագի դրսևորած արի ոգով ու խիզախ պահվածքով:

Գնահատանքով անդրադառնալով Հայոց բանակում հայ հոգևորականների առաքելությանը` Նորին Սրբությունը նշել է, որ մեծ մխիթարություն է տեսնել` ինչպես են Հայ Եկեղեցու հոգևորականները, ի դեմս Հովհաննես սարկավագի, իրենց նվիրյալ ու նախանձախնդիր ծառայությունն իրականացնում` սպասավորելով հայ զինվորին, անգամ մարտական դիրքերում մշտապես կանգնած լինելով նրա կողքին և նրա հետ հաճախ հայտնվելով կյանքի և մահվան սահմանագծում:

Ամենայն Հայոց Կաթողիկոսը նաև գոհունակությամբ ողջունել է Հովհաննես սարկավագի որոշումը` շարունակելու իր ծառայությունը Հայոց բանակին և Հայրենիքին:

Ներկայիս Հայոց բանակի հոգևոր առաջնորդության կազմում, ՀՀ և ԼՂՀ տարբեր զորամասերում իրենց ծառայությունն են բերում 52 եկեղեցականներ: