Արցախում վաղաժամ են համարում սահմանադրական փոփոխությունների մասին խոսելը

Tert.am-ը գրում է.

Լեռնային Ղարաբաղի Հանրապետության Նախագահի մամուլի խոսնակ Դավիթ Բաբայանը Tert.am-ի հետ զրույցում պատասխանելով հարցին, թե հնարավո՞ր է, որ հետևելով Հայաստանի օրինակին՝ Արցախն առաջիկայում սահմանադրական փոփոխություններ իրականացնի, ասաց, թե կարելի է ասել, որ Արցախում սահմանադրական բարեփոխումների մի փուլն արդեն ավարտվել է:

«Մենք արդեն ունենք պրոֆեսիոնալ հիմունքներով գործող խորհրդարան, փոխվել է նաև համամասնական և մեծամասնական կարգով ընտրված պատգամավորների թիվը: Համամասնականով մոտ երկու անգամ ավելի պատգամավորներ են ընտրվում, քան՝ մեծամասնականով»,- ասաց Դավիթ Բաբայանը՝ նշելով, որ սա արդեն իսկ սահմանադրական բարեփոխում է, որովհետև պետական կարևորագույն օրգաններից մեկը վերափոխվել է:

Ինչ վերաբերում է այլ տիպի փոփոխություններին, քաղաքական դաշտում դեռևս որևէ կուսակցությունից կամ պետական մարմնից հայտ չկա:

«Հետևաբար, վաղաժամ է խոսել որևէ սահմանադրական փոփոխությունների մասին»,- ասաց Դավիթ Բաբայանը: 

ԼՂՀ կոմունիստական կուսակցության ներկայացուցիչ Հրանտ Մելքումյանի համոզմամբ՝ Արցախը չի կարող լինել Հայաստանի նման՝ որոշումներ կայացնելու հարցում, քանի որ ընդամենը 15 կիլոմետր է հեռու գտնվում թշնամու սահմանից:

«Մենք ոչ պատերազմ, ոչ խաղաղություն իրավիճակում ենք: Սահմանադրական փոփոխությունների դեպքում պետք է անցնել խորհրդարանական կառավարման համակարգին, իսկ ես դրան կողմ չեմ, քանի որ մեզ պետք է կայուն պետություն»,- ասաց Հրանտ Մելքումյանը:

Վերջինիս խոսքով՝ Արցախում պետք է լինի կենտրոնացված իշխանություն:

Ինչ վերաբերում է գործող Սահմանադրությանը, Հրանտ Մելքումյանն ասաց, թե չէր ասի, որ այն լավ սահմանադրություն է, կարիք կա փոփոխության, բայց ոչ հիմա:

«Երբ Ղարաբաղի հարցը լուծվի, այն ժամանակ կարիք կլինի նոր սահմանադրության, այնպիսի սահմանադրության, որը կլինի հավիտյան և ընդունելի կլինի հանրության բոլոր շերտերի համար»,- ասաց Արցախի կոմկուսի ներկայացուցիչը: