Ընտանիքի միակ արու զավակ զինվորներին առաջին գիծ չտանելու մասին օրենքը լուրջ ռիսկեր է պարունակում

Նոր իմացա, որ նոր օրենք են ուզում ընդունել, որով ընտանիքի միակ արու զավակը հանդիսացող ժամկետային զինծառայողներին այլևս չեն ներգրավի առաջնագծում դիրքապահ ծառայությանը։ Առաջին հայացքից այս օրենքը շատ դրական ու հեռանկարային է թվում, սակայն եթե ավելի ուշադիր քննեք այն, ապա կտեսնեք, որ դրանում իրականում ոչ մի դրական բան չկա։

Նախ՝ այս օրենքը մեծ ռիսկեր է ենթադրում, քանի որ ի՞նչ երաշխիք կա, որ այն չի հանգեցնի նրան, որ ծնողները խուսափեն երկրորդ տղան ունենալուց։ Եվ իրոք, ինչի՞ ծնողն ունենա երկու տղա, եթե երկու և ավել տղա ունենալու դեպքում նա ստիպված է լինելու սթրեսներ տանել իր երկու և ավել տղաների համար էլ, երբ գա նրանց զորակոչվելու ժամանակը։ Փոխարենը կարելի է ունենալ միայն մեկ տղա և ըստ ցանկության՝ աղջիկներ և չանհանգստանալ դրա համար։

Անունը դրել են, որ գենոֆոնդի մասին են մտածում, մինչդեռ կարծես նոր արհեստական միջավայր են ստեղծում՝ սեռով պայմանավորված աբորտների բարգավաճման համար։ Ու հետո, այնպիսի տպավորություն է, որ երկու և ավել որդիներ ունեցողներն ինչ-որ երկրորդ սորտ են, ու նրանց արյունն ավելի էժան արժե, քան միակ արու զավակներինը։

Կարծում եմ, որ այս օրենքը դեռ շատ հում է ու բազմաթիվ ռիսկեր է ենթադրում, և վաղ է նման բան գործարկելը մեզ մոտ։ Փոխարենն ավելի լավ է կենտրոնանալ նրա վրա, թե ինչպես նվազեցնեն մարտական կորուստները ժամանակակից տեխնոլոգիաների ու մարտավարության յուրացմամբ։