Թուրինջի օգտակար հատկությունների, դրանով պատրաստվող դիմակի ու կոկտեյլի մասին


22:53 , 30 հոկտեմբեր, 2012

Թուրինջը միշտ էլ համարվել է առողջության և գեղեցկության միրգ։ Այն մշտադալար, ջերմասեր բույս է, աճում է միայն արևադարձային գոտիներում։ Յուրաքանչյուր ծառը տալիս է 200-300 պտուղ։ Հասունանալով դեկտեմբերին՝ թուրինջի պտուղներն իրենց հատկությունները պահպանում են մինչև հուլիս։ Օգտակար եւ հրաշալի այս մրգի անվանումը անգլերենից թարգմանաբար նշանակում է «խաղողային միրգ», սակայն իր համային հատկանիշներով թուրինջը ոչ մի ընդհանուր բան չունի խաղողի հետ։ Պարզապես ճյուղերի վրա խաղողի նման աճում է ողկույզներով 6-18 հատ։ Թուրինջը պոմպելմուսի և նարնջի հիբրիդն է։ Առավել օգտակար է կարմիր թուրինջը։ Այն խորհուրդ է տրվում օգտագործել նաև դիետաների ժամանակ։ Պարունակում է ճարպերն այրող եւ լյարդի աշխատանքը ակտիվացնող նյութեր։ Մեկ հատը պարունակում է C վիտամինի օրական նորման: Սակայն, դրանով չի ավարտվում է թուրինջի յուրահատկությունը: Այս միրգն ընդունակ է վերականգնել ԴՆԹ-ի վնասված հյուսվածքները` կանխարգելելով քաղցկեղի մի քանի տեսակների առաջացումը: Նաև` լավացնում է սրտի աշխատանքը, պակասեցնում ինչպես խոլեստերինի, այնպես էլ` ինսուլինի քանակությունը` օրգանիզմին թույլ տալով ավելի շատ էներգիա ստանալ սննդից և դրանով նպաստելով նիհարելուն:

«Ճիշտ» ուտելու դեպքում կարելի է խուսափել թուրինջին բնորոշ դառնահամից, թուրինջը պետք է ուտել գդալով նախապես պտուղը հորիզոնական կիսելով։ Բանն այն է, որ դառնահամությունը մրգին հաղորդում է միջնորմների թաղանթը։
Թուրինջը գրգռում և ակտիվացնում է ախորժակը, նպաստում է մարսողությանը, օգնում է արյան ճնշման իջեցմանը, շատ օգնում լյարդի ֆունկցիաների խախտման ժամանակ։ Թուրինջ ուտել խորհուրդ են տալիս այն մարդկանց, որոնք ունեն մտավոր գերծանրաբեռնվածություն, օրգանիզմի իմունային համակարգի թուլացում, տարել են վիրահատություններ, այն նպաստում է կենսագործունեության բարձրացմանը։
Թուրինջի պտուղը պարունակում Է 88, 5– 90, 9% ջուր, 3, 8-6, 78% շաքար, 1, 42-2. 38% թթուներ, եթերային յուղեր, պեկտինային և ներկանյութեր, հանքային աղեր, վիտամին C (մինչեւ 45մգ), B1, D, P, նարինգինի գլիկոզիդ, որն էլ հենց հաղորդում Է դառնահամություն։ Կեղևը, որը կազմում է պտուղի քաշի 30-40%-ը, պարունակում Է 9, 19-19, 04% պեկտինային նյութեր, եթերայուղեր, գլիկոզիդներ։
Դեղամիջոցների եւ կոսմետիկ միջոցների արտադրության մեջ օգտագործում են թուրինջի հյութը, միջուկը եւ կեղևը։ Հյութը համարվում է սպիտակեցնող արդյունավետ եւ մաշկը խնայող լավագույն միջոց։ Դիմակները եւ շփումները խորհուրդ են տրվում ճարպոտ եւ նորմալ մաշկ ունեցողներին։ Օգտակար է օգտագործել նման դիմակները վզի մաշկի սնուցման և ամրացման համար։ Թուրինջի հյութով դեմքը կարելի Է մաքրել նաև պիգմենտային հետքերն ու պեպենները վերացնելու նպատակով:

Դիմակներ

Թուրինջի կեղևը մաքրել, միջուկը կտրատել և քամել հյութը։ Բամբակե տամպոնը թաթախել հյութի մեջ, ամեն առավոտ և երեկո քսել պեպենոտ և բծեր ունեցող մաշկին։ Պատանեկան կորյակների դեպքում խորհուրդ է տրվում կիրառել թուրինջի հյութից պատրաստված լոսյոն, որը պատրաստելու համար թուրինջի հյութին պետք է հավասար քանակով ավելացնել կաղնու կեղևի եփուկ։
Ճարպոտ մաշկ ունեցողներին խորհուրդ է տրվում մաշկը սրբել թուրինջի հյութի լոսյոնով, որի մեջ պետք է կաթեցնել մի քանի կաթիլ քափուրի (կամֆորա) սպիրտ։
Ճարպոտ մաշկի համար շատ օգտակար է նաև հանքային ջրի և 1 ճաշի գդալ թուրինջի հյութի խառնուրդով լվացումը։
Սառցախցիկում սառեցրեք մի քանի շերտ թուրինջ եւ դրանցով 5-8 րոպե մերսեք դեմքի և վզի մաշկը։ 10 րոպեից լվացվեք և քսեք ձեր մաշկի տեսակին համապատասխան քսուք։
Թուրինջը հակակնճիռային հրաշալի միջոց է. թուրինջի միջուկը կամ մի քիչ հյութը խառնել 1 թեյի գդալ թթվասերի (կամ փսորված եւ քամած կաթի), 1 թեյի գդալ գագարի հյութի և 1 ճաշի գդալ բրնձի ալյուրի հետ։ Խառնուրդը քսել դեմքին, վզին, կրծքին եւ թողնել 30 րոպե, այնուհետև դիմակը լվանալ գոլ ջրով եւ քսել թուրինջի հյութ, թողնել, որ չորանա։ Այս դիմակը խորհուրդ է տրվում շաբաթը 2 անգամ, մեկ ամսվա ընթացքում։
1 ճաշի գդալ բրինձի ալյուրին խառնել 1 ճաշի գդալ մածուն եւ 2 ճաշի գդալ թուրինջի հյութ։ Այս դիմակը հարթեցնում է կնճիռները և կանխարգելում է դրանց առաջացումը։ Խորհուրդ է տրվում ամեն տեսակի մաշկի համար։
Մաշկի սպիտակեցման համար խորհուրդ է տրվում կիրառել թթխմորով և թուրինջի հյութով պատրաստված դիմակ. 15–20գ թթխմորը լավ խառնել 1-1, 5 թեյի գդալ հյութի հետ, այդ տարան 2-3 րոպե դնել եռացրած ջրի մեջ։ Դիմակը դնել դեմքին 15-20 րոպե, հետո դիմակը մաքրել թեյի թույլ թուրմով։ Դեմքը չորացնել և քսուք քսել։
Սպիտակեցման համար մաշկաբանները խորհուրդ են տալիս հետևյալ դիմակը, մաքուր մաշկի վրա դնել թուրինջի հյութով թրջած թանձիվ։ Թողնել 15-20 րոպե, որից հետո սրբել դեմքը մաքուր ջրով թրջած բամբակով, այնուհետև չորացնել։ Խորհուրդ է տրվում 15-20 դիմակ, շաբաթական 2-3 անգամ։ Հյութի փոխարեն կարելի է թանձիվի վրա դնել թուրինջի միջուկի քերուկ։
Ձվի մեկ դեղնուցին ավելացնել 1 թեյի գդալ մեղր և 1/2 թեյի գդալ թուրինջի հյութ։ Այս բաղադրատոմսը խորհուրդ է տրվում դեմքի չոր մաշկ ունեցողներին։
Ձվի մեկ դեղնուցը լավ հարել, ավելացնել 1 ճաշի գդալ թուրինջի հյութ, 1 թեյի գդալ բուսական յուղ։ Այդ ամենը լավ հարել, ավելացնել 1 ճաշի գդալ թթվասեր։ Թանձրության համար կարելի է ավելացնել նաև սև հացի միջուկ (նախապես այն պետք է թրջել կաթի մեջ)։ Այս խառնուրդը քսել մաքուր դեմքին, թողնել 15-20 րոպե։ Այնուհետև դեմքը լվանալ գոլ ջրով և քսել մաշկին համապատասխան քսուք։ 10 րոպեից քսուկի ավելցուկը հեռացնել թղթե անձեռոցիկով։ Այս դիմակը խորհուրդ է տրվում չոր մաշկի դեպքում։
Դիմակներ պատրաստելու համար խորհուրդ է տրվում կիրառել թուրինջի և’ հյութը, և՛ միջուկը։ Միջուկի քերուկը դնել թանձիվի վրա և դնել ճարպոտ մաշկին։
Ճարպոտ մաշկի դեպքում խորհուրդ է տրվում նաև այս դիմակը, թուրինջի հյութը խառնել սովորական ալյուրի կամ ծեծած վարսակաալյուրի հետ, քսել դեմքին, թողնել 15-20 րոպե, լվանալ գոլ ջրով։
Ամեն տեսակի մաշկի սնուցման համար խորհուրդ է տրվում օգտագործել թուրինջի միջուկի և 1 բաժակ թթված կաթի խառնուրդ: Այն որոշ ժամանակ սառնարանում թողնելուց հետո քսել դեմքի և վզի մաշկին, թողնել 30 րոպե, ապա լվանալ գոլ ջրով։
Որպեսզի արմունկների կոշտացած մաշկը փափկի, 10 րոպե դրանց վրա դրեք թուրինջի բարակ շերտեր։
Թուրինջի կեղևով կարելի է 10 րոպե մերսել ձեռքի մաշկը, այնուհետեւ լվանալ և քսել ճարպոտ քսուք։

ԿՈԿՏԵՅԼ «ՎԱՐԴԱԳՈՒՅՆ ԹՈՒՐԻՆՋ»

Բաղադրիչներ.

օղի – 100 մլ,
նարնջի լիկյոր – 50 մլ,
թարմ քամած կիտրոնի հյութ – 50 մլ,
թարմ քամած թուրինջի (грейпфрут) հյութ – 150 մլ,
սառույց

Շեյկերիի կամ ոչ մեծ սափորի մեջ խառնել սառույցը, կիտրոնի և թուրինջի հյութերը, օղին և լիկյորը: Կոկտեյլի բաժակների մեջ լցնել սառույց, կոկտեյլը քամելով լցնել վրան: Զարդարել թուրինջի շերտերով և մատուցել: