Մանուկյանների ընտանիքի 12 երեխաներից 6 դպրոցահասակները դպրոց չեն հաճախում. հագուստ չունեն (տեսանյութ)
16:54 , 13 նոյեմբեր, 2014Tert.am-ը գրում է․
Տասներկու երեխաների մայր Արմենուհի Մանուկյանն այսօր իր վեց անչափահաս երեխաների հետ Կառավարության շենքի դիմաց էր: Նրա վեց դպրոցական երեխաները սեպտեմբերից դպրոց չեն հաճախում, որովհետև հագուստ չունեն: Արմենուհի Մանուկյանը Tert.am-ի հետ զրույցում նշեց, որ խնդրում է, որ որևէ մեկը ձեռք պարզի իրենց ընտանիքին:
«Ես չեմ աշխատում, որովհետև բազմազավակ մայր եմ, փոքրիկ երեխաներ ունեմ, եթե աշխատեմ նրանց ո՞վ կխնամի: Ամուսինս էլ Արցախի ազատամարտի մասնակից է, երկրորդ կարգի հաշմանդամ, աշխատել չի կարող: 60 հազար դրամ աղքատության նպաստ ենք ստանում, բայց գումարը չի բավարարում անգամ մի երեխայի հոգսերին»,-ասաց նա:
Տիկին Արմենուհին նաև նշեց, որ իրենք ապրում են Խարբերդում, որը Շենգավիթ վարչական շրջանի մի մասն է կազմում:
«Երևանի քաղաքապետարանի կրթության վարչությունից ինձ պատասխանել են, որ «Շենգավիթի ղեկավարը կօգնի ձեզ, ձեր ընտանիքին, որպեսզի ձեր 6 անչափահաս երեխաները դպրոց հաճախեն», բայց մենք այդ օգնությունը չտեսանք, սեպտեմբերի 23-ից ես դիմել եմ իրենց»,-ասաց նա և նշեց, որ երեխաները սովորաբար հաճախում են Վարդևանյանի անվան 173 դպրոց:
Մայրիկի հետ կառավարության շենքի մոտ գտնվող վեց երեխաներից մեկը նշեց, որ իրենք չեն կարողանում դպրոց գնալ, որովհետև համադասարանցիները ծիծաղում են իրենց շորերի վրա և լաց եղավ:
Տեսանյութն՝ այստեղ