Հարց սեքսոպաթոլոգին: «Ունեցել եմ ամորձիների հիվանդություն, բուժում եմ ընդունել և ամորձիներիցս մեկը շատ փոքրացել է»
19:00 , 2 նոյեմբեր, 2013Հարց՝
Բարև ձեզ, հարգելի բժիշկ, ես 16 տարեկանում ունեցել եմ ամորձիների հիվանդություն` օրխիտ, բուժում եմ ընդունել, այժմ 19 տարեկան եմ, գանգատներ չունեմ, բայց բուժումից հետո ամորձիներիցս մեկը շատ փոքրացել է:
Հարցին պատասխանում է բժիշկ-սեքսոպաթոլոգ, դոցենտ, ԵՊԲՀ սեքսոպաթոլոգիայի ամբիոնի վարիչ, սեքսոպաթոլոգիայի համալսարանական կլինիկայի ղեկավար Սևադա Հակոբյանը.
Ամորձիների և հավելումների բորբոքային հիվանդությունները (օրխիտ, օրխոէպիդիդիմիտ) , հատկապես եթե արձանագրվում են սեռահասունության տարիքում, կարող են բացասական անդրադառնան այդ տարիքային խմբին բնորոշ ակտիվ սերմառաջացման գործընթացների վրա: Այո, մտահոգվելու կարիք կա, քանի որ օրխիտից հետո Ձեզ մոտ արձանագրվել է ամորձու հիպոտրոֆիա (չափերի փոքրացումը խոսում է ամորձու թերսնուցման մասին): Այս դեպքում պարտադիր պետք է հանձնեք սերմնահեղուկի հետազոտություն (սպերմոգրամմա)՝ որպեսզի գնահատվի սպերմատոգեն (սերմառաջացման) ֆունկցիայի վիճակը: Այդ տարիքային խմբում հատկապես չափազանց ուշադիր պետք է լինել ամորձիների հիվանդությունների (բորբոքային, վիրուսային՝ խոզուկ՝ պարոտիտ), տրավմաների նկատմամբ, քանի որ ոչ պատշաճ հետևողականության արդյունքում առաջացած փոփոխությունները կարող են հետագայում հանգեցնել արական անպտղության: