Սպիտակ տունը մշակել է 2 փորձարարական ռազմավարական ծրագիր, որոնք կարող են կյանքի կոչվել Հյուսիսային Կորեայի կողմից հրթիռային հարվածի իրականացման դեպքում:
Ինչպես հայտնում է The New York Times-ը, առաջին ծրագիրը ենթադրում է կիբերհարձակման իրականացում Հյուսիսային Կորեայի բալիստիկ հրթիռների արձակման համակարգերի և սաբոտաժի այլ միջոցների նկատմամբ:
Մինչդեռ 2-րդ ծրագիրը ենթադրում է հարված հասցնել հրթիռներին, երբ դրանք անցնելիս կլինեն «արագացման փուլով»:
Աղբյուրը նկատում է, որ անմիջապես արձակումից հետո բալիստիկ հրթիռներն առավել տեսանելի կլինեն ու հեշտ թիրախ կդառնան:
Դրանք խոցելու համար Սպիտակ տունն առաջարկում է օգտագործել կործանիչներ ու անօդաչու թռչող սարքեր: Սակայն եթե կործանիչներն ու անօդաչուները չկարողանան իրականացնել առաջադրանքը, «վերջին հույսը» կլինի որսիչ-հրթիռը:
Հայտնի է, որ փորձարարական ռազմավարական ծրագրերի իրակացման համար Սպիտակ տունը Կոնգրեսից 4 մլրդ դոլար է խնդրել:
Ավելի վաղ ԱՄՆ-ի նախագահ Դոնալդ Թրամփը հայտարարել էր, որ բոլոր «պատասխանատու երկրները» պետք է միավորեն ջանքերը՝ Հյուսիսային Կորեային մեկուսացնելու համար։ Նա, մասնավորապես, կոչ է արել Ռուսաստանին և Չինաստանին կրճատել այդ երկրի հետ դիվանագիտական և տնտեսական կապերը:
«Մենք կոչ ենք անում բոլոր երկրներին, այդ թվում՝ Ռուսաստանին և Չինաստանին, իրականացնել ՄԱԿ-ի բանաձևերը, նվազեցնել ԿԺԴՀ-ի վարչակազմի հետ դիվանագիտական հարաբերությունները և փոխհարաբերություններն առևտրի ու տեխնոլոգիաների փոխանակման ոլորտում»,- ասել է Թրամփը՝ հանդես գալով Հարավային Կորեայի խորհրդարանում:
Ընդորում՝ Թրամփը նախազգուշացրել է ԿԺԴՀ-ին չթերագնահատել ԱՄՆ-ին և կոչ է արել բոլոր երկրներին ապահովել Փհենյանի միջազգային մեկուսացումը:
Նրա խոսքով՝ ԱՄՆ-ն «թույլ չի տա, որ երկրի քաղաքացիներին սպառնան»:
«Մեզ չես վախեցնի»,- հավելել է Թրամփը: