Azatutyun.am-ը գրում է.
Գլխավոր դատախազության պետական շահերի պաշտպանության վարչության ուսումնասիրությամբ պարզվել է, որ կառավարությանն առընթեր անշարժ գույքի կադաստրի պետական կոմիտեում ներդրված ARPIS էլեկտրոնային համակարգում չեն վերծանվել 2013-2017 թվականների հաշվետու եռամսյակների վերջին օրերի գործարքները՝ համակարգը վերծանել է մինչև եռամսյակի վերջին օրվա գործարքները: Արդյունքում, ինչպես հայտնում է դատախազության հանրային կապերի բաժինը, Հայաստանի տարածքում կատարված անշարժ գույքի 3204 գործարքների վերաբերյալ տեղեկությունները չեն արտացոլվել եռամսյակային հաշվետվություններում և չեն ներկայացվել կառավարությանն առընթեր պետական եկամուտների կոմիտեին (ՊԵԿ):
Մասնավորապես, հաղորդագրության համաձայն, նշված էլեկտրոնային համակարգում չեն վերծանվել տնտեսվարող սուբյեկտների կողմից կատարված՝ ԱԱՀ-ով հարկման ենթակա ընդհանուր 1 միլիարդ 108 միլիոն 58 հազար 395 դրամ կադաստրային և 3 միլիարդ 258 միլիոն 931 հազար 861 դրամ պայմանագրային արժեքով թվով 110 գործարքների և ֆիզիկական անձանց կողմից կատարված՝ 76 հասարակական, արտադրական նշանակության՝ ընդհանուր 1 միլիարդ 92 միլիոն 450 հազար 19 դրամ կադաստրային և 1 միլիարդ 73 միլիոն 993 հազար 510 դրամ պայմանագրային արժեքով անշարժ գույքի նկատմամբ գործարքները, ինչի հետևանքով պետական լիազոր մարմինը տարիներ շարունակ զրկվել է հարկերի գանձման գործառույթներն օրենքով սահմանված կարգով պատշաճ իրականացնելու հնարավորությունից:
Ստացված տվյալները տրամադրվել են ՊԵԿ-ին, և հանձնարարվել է պարզել հարկման ենթակա այն գործարքները, որոնցով չեն հաշվարկվել և չեն գանձվել հարկման ենթակա գումարները:
Ամբողջական հոդվածը կարող եք կարդալ այստեղ։
