Azatutyun.am-ը գրում է.«Ավրորա» մարդասիրական նախաձեռնության շնորհիվ Հայաստանի ու Հայոց ցեղասպանության մասին այսօր խոսում են երկրներում, որտեղ հայերի մասին նախկինում չէին էլ լսել, վստահ են «Ավրորա»-ի երեք համահիմնադիրները։
Նրանցից հայտնի գործարար Ռուբեն Վարդանյանի խոսքով՝ մտայնությունը, թե ամեն ինչ վատ է և ոչ մի դրական բան չկա, շատ վտանգավոր է ցանկացած հասարակության համար, դրա համար էլ պետք են «Ավրորա»-ի հերոսները։
«Մենք պիտի ավելի շատ խոսենք այս լավի մասին, մենք պիտի ավելի շատ պատմենք հերոսների մասին, պիտի ամեն ինչ անենք, որ մարդիկ էս ապատիայից և անտարբերությունից դուրս գան և հասկանան, որ իրենց կյանքի ապագան կախված է իրենցից, ոչ թե ինչ-որ մեկից», - ասաց Վարդանյանը:
«Ավրորա»-ի մեկ այլ համահիմնադիր՝ Նյու Յորքի «Քարնեգի» հիմնադրամի նախագահ Վարդան Գրեգորյանն էլ վստահ է, որ հայկական աշխարհում ներփակվելով առաջընթաց հնարավոր չէ։
«Այնպիսի օրեր ենք ապրում, որ ամենքը ցինիկ են եղել, ոչ մի բանի չեն հավատում մարդիկ՝ էնքան դավաճանել են իրենց, էնքան խաբվել են մարդիկ, էնքան հիասթափված են, որ չեն հավատում մի բանի: Դրա համար է, որ պետք ունենք մարդկանց, որ իրենց օրինակով ցույց տան, որ հասարակության համար են իրենք, մարդկության պատվավորության համար են, ոչ թե միայն իրենց շահերի համար», - հայտարարեց Գրեգորյանը:
Դիլիջանի միջազգային քոլեջում կազմակերպված «Ավրորա» քննարկումների շարքի մեկնարկից առաջ ամերիկահայ հայտնի գործիչն անդրադարձավ նաև քննադատություններին, թե ինչու «Ավրորա»-ի վրա ծախսվող միլիոնավոր դոլարները չեն ուղղվում Հայաստանի բնակչությանն օժանդակելուն։
«Ես հիմա որ գալիս էի ճամփան, կազինոները, մեկը չի քննադատում՝ էս մեր ազգը, երկիրը ինչու էդքան կազինոներ պիտի լինեն, պալատի նման սարքել են: Առաջին անգամ որ եկա, ասի՝ էս կազինոները ո՞ւմ են պատկանում, դրամ էս երկրից են տանում՝ ոչ մեկը չի քննադատում, դրամը, ասում է, բերել եք էստեղ՝ ուրիշին եք տալիս, քննադատում է», - նշեց Վարդան Գրեգորյանը՝ շարունակելով․ - «Բայց մենք չպիտի մեղադրվեք, թե Դիլիջանում այսպիսի դպրոց ենք սարքել, եթե տասը հատ ուրիշ կարող էինք սարքել: Ինչո՞ւ չեն սարքել մինչ այդ՝ փոխանակ կազինո առնելու: Ամեն կազինոյի 50 տոկոսը որ կա, պետք է գնա դպրոցներին: Ուրիշ բաներ էլ կան անելու: Այնպես որ, ես շատ հպարտ եմ, որ «Ավրորա»»-ն ամբողջ աշխարհը բերել է Հայաստան»:
Ամբողջական հոդվածը կարող եք կարդալ այստեղ:
