Yerkir.am-ը գրում է.
Ավստրիայի արտգործնախարար Սեբաստիան Կուրցը հայտարարել է, որ իշխանությունները չեն ողջունում երկրում Թուրքիայի նախագահ Էրդողանի մասնակցությամբ` Թուրքիայի սահմանադրական փոփոխությունների վերաբերյալ հանրաքվեի կապակցությամբ միջոցառումներին. հայտնում է France Presse-ը:
«Իհարկե, Թուրքիայի նախագահը, ինչպես ցանկացած այլ բարձրաստիճան պաշտոնյա, կարող է երկկողմ այցեր կատարել Եվրոպա և Ավստրիա` բարձրաստիճան պաշտոնյաների հետ բանակցելու: Սակայն մենք մերժում ենք թուրքական ընտրարշավի իրականացումը և կենտրոնացումը Ավստրիայում»,- հավելել է նա:
Կուրցը ընդգծել է, որ Էրդողանի նախորդ այցերը Ավստրիա և Գերմանիա լարվածություն են առաջացրել նրա կողմնակիցների և Թուրքիայի` ազգությամբ քուրդ քաղաքացիների միջև:
Նշենք, որ Թուրքիայի վարչապետ Բինալի Յըլդըրըմն ավելի վաղ հայտարարել էր, որ Էրդողանը հանրաքվեի նախաշեմին պատրաստվում է մի շարք միջոցառումներ անցկացնել ԵՄ երկրներում:
