Aysor.am-ը գրում է.Նոյեմբերի 5-ին ԼՂՀ ԱԺ-ում տեղի է ունեցել խորհրդարանի մշտական հանձնաժողովների և խմբակցությունների ղեկավարների հանդիպումը ՀՀ վարչապետ Կարեն Կարապետյանի և նրա հետ Արցախ ժամանած կառավարության մի խումբ անդամների հետ: Այս մասին տեղեկացնում է ԼՂՀ կառավարության մամուլի ծառայությունը:
Ողջունելով հյուրերին՝ խորհրդարանի նախագահը կարևորել է ՀՀ վարչապետի՝ Արցախ այցի շրջանակում ԼՂՀ օրենսդիր մարմնի հետ հանդիպելու նախաձեռնությունը:
«Այս այցը միայն արարողակարգային չէ, այն ակնհայտ նպատակային մտադրություն է Արցախ-Հայաստան բարձր մակարդակի հարաբերությունները ոչ միայն պահելու, այլև՝ դրանք ընդլայնելու, խորացնելու և առկա կապերը համակողմանի դարձնելու համար», - նշել է Աշոտ Ղուլյանը:
Այնուհետև խորհրդարանի նախագահը Կարեն Կարապետյանին է ներկայացրել հանդիպմանը ներկա ԼՂՀ ԱԺ մշտական հանձնաժողովների նախագահներին և խմբակցությունների ղեկավարներին:
Շնորհակալություն հայտնելով ընդունելության համար՝ Կարեն Կարապետյանը ընդգծել է, որ այս այցը հնարավորություն է՝ Հայաստանի և Արցախի միջև կապերն ավելի ամրապնդելու համար:
«ՀՀ կառավարության անդամների համար կարևոր է քննարկել, լսել ձեր տեսակետները ՀՀ և ԼՂՀ տնտեսական և անվտանգության հարցերի վերաբերյալ», - նշել է Կարեն Կարապետյանը:
Հանդիպման ընթացքում ԼՂՀ ԱԺ պատգամավորները ՀՀ վարչապետի հետ քննարկել են տնտեսական, սոցիալական, քաղաքական ոլորտներին և դրանց օրենսդրական կարգավորումներին վերաբերող հարցեր:
Ձեռք է բերվել պայմանավորվածություն՝ օրենսդիր-գործադիր երկխոսությունը շարունակելու նպատակով, հաջորդաբար քննարկել գործնական համագործակցության թեմաները:
Նյութի աղբյուր՝ http://www.aysor.am/am/news/2016/11/05/%D4%BF%D5%A1%D6%80%D5%A5%D5%B6-%D4%BF%D5%A1%D6%80%D5%A1%D5%BA%D5%A5%D5%BF%D5%B5%D5%A1%D5%B6/1164125
Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print
Տպել
