Tert.am-ը գրում է.
Որպեսզի նոր Ընտրական օրենսգիրքը վստահություն ներշնչի հասարակությանը, բարձրանա ընտրական գործընթացի հանդեպ հանրային վստահությունը, պետք է հասարակությանն ավելի հանրամատչելի ներկայացվի նոր ԸՕ-ում ներառված զսպող մեխանիզմները: Tert.am-ի հետ զրույցում ասաց ԱԺ պետաիրավական հարցերի մշտական հանձնաժողովի նախագահ, ՀՀԿ խմբակցության պատգամավոր Հովհաննես Սահակյանը: Վերջինս նշեց, որ 102 ձայնով ԱԺ կողմից ընդունված նոր ԸՕ-ն, կոնսենսուսով ընդունված փաստաթուղթ էր, բայց ոչ լայն:
- Օրերս 102 ձայնով Ազգային ժողովն ընդունեց Ընտրական օրենսգիրքը, որը իշխանությունների կողմից գնահատվեց որպես կոնսենսուսով ընդունված փաստաթուղթ, թեև ԸՕ քվեարկությունից առաջ Կառավարության աշխատակազմի ղեկավար-նախարար Դավիթ Հարությունյանը հայտարարել էր, որ ԸՕ-ի շուրջ կոնսենսուս դեռ ձևավորված չէ: Ինչպե՞ս կբացատրեք այս հակասությունը:
- Հակասություն չկա: Գուցե Դավիթ Հարությունյանը նկատի է ունեցել լայն կոնսենսուսը: Ես կարծում եմ, որ Ընտրական նոր օրենսգրքի շուրջ աշխատանքային քննարկումների, «4+4+4» ձևաչափով քննարկումների, հանրային լսումների շնորհիվ, մենք ամեն ինչ արել ենք, որ քննարկումները տան իրենց արդյունքները: Մանրակրկիտ քննարկումներ ենք անցկացրել, հատ առ հատ անդրադարձել ենք բոլոր դրույթներին: Եվ այս քննարկումների արդյունքում է, որ մենք ունենք 102 ձայների հարաբերակցությամբ ընդունված փաստաթուղթ, որոնց թվում նաև` ընդդիմադիր պատգամավորներ կան: Իհարկե, կան դեռևս տարբեր հարցեր, որոնք քննարկման կարիք ունեն, կա դրա անհրաժեշտությունը: Ես ինքս ամեն ինչ կանեմ, որ մինչև 2017թ.-ի գարուն՝ համապետական ընտրությունները, մենք ունենանք ավելի լայն կոնսենսուս:
- Ավելի լայն կոնսենսուսի հասնելու համար քննարկման ինչպիսի՞ ֆորմատ է առաջարկվում: Գուցե պահպանվելո՞ւ է «4+4+4»-ի ֆորմատը:
- Էականը ֆորմատը չէ: Նայեք, եթե իշխանությունն ու ընդդիմությունը, օրինակ, տեսախցիկներ տեղադրելուն կողմնակից են, բայց դրանք այս պահին չեն տեղադրվում, այս ընթացքում, եթե համապատասխան գումար գտնվի, կարող ենք կյանքի կոչել այս կետը, կարող ենք ԸՕ մեջ շատ արագ փոփոխություններ կատարել ու ավելացնել դրույթը: Մենք պատրաստ ենք: Եթե այլ հարցերում էլ կլինեն ընդհանրական մոտեցումներ՝ արագ կկազմակերպենք:
- Պարոն Սահակյան, երբ խոսվում էր Ընտրական օրենսգրքի փոփոխության մասին, իշխանությունը խոստովանում էր, որ նախորդ փաստաթղթում վերարտադրությանը նպաստող բացեր կան և հավաստիացնում, որ հենց դրա համար է փոխում ԸՕ-ն: Նոր փաստաթուղթը իշխանությունների վերարտադրության համար տեղ չի՞ թողնում:
- Վերարտադրություն բառը առաջին հայացքից վատ ասոցիացիաներ ունի, բայց ցանկացած քաղաքական ուժ, որն իշխանության մեջ է, փորձում է նորից գալ իշխանության: Իշխանություններն ամեն ինչ անելու են, որ մնան իշխանության: Նոր Ընտրական օրենսգիրքը, կարծես, առավել հավասար պայմաններ է ստեղծում: Եթե փորձենք վերլուծել, թե տարածքներում առաջադրվելու դեպքում ինչ մեխանիզմներ կան, որ փոքր թվով ձայներ ստացած ընդդիմադիրը կարող է հայտնվել խորհրդարանում, իսկ մեծ թվով ձայներ ստացած իշխանության ներկայացուցիչը՝ ոչ, քանի որ թիմային աշխատանք է տարվում, կտեսնենք, որ հավասարություն կա: Ընտրությունները բոլոր քաղաքական ուժերի համար հնարավորություն են՝ իշխանության գալու, խորհրդարանում հայտնվելու:
- Այսինքն, ստացվում է, որ վերարտադրության հնարավորությունը նոր ԸՕ-ում էլ կա՞:
- Մի դեպքում կարող է չլինել, եթե ընտրություններին չմասնակցենք:
- Նոր Ընտրական օրենսգիրքը, Ձեր կարծիքով, նպաստելո՞ւ է ընտրական գործընթացի հանդեպ վստահության մեծացմանը:
- Որպեսզի ԸՕ-ն վստահություն ներշնչի հասարակության մեջ, պետք է հասարակությանն ավելի վստահելի ներկայացվի: Կենտրոնական ընտրական հանձնաժողովը կազմակերպում է դասընթացներ պատասխանատուների, մասնակիցների համար՝ հանձնաժողովի անդամներ, վստահված անձինք, դիտորդներ, բայց սա բավարար չէ: Նույն կերպ հանրամատչելի պետք է ներկայացվի հանրությանը, թե ինչ իրավունքներ ունի ընտրողը, ինչ նոր գործիքակազմ կա: Ես անձամբ պատրաստվում եմ լսումներ կամ քննարկումներ անցկացնել:
