Tert.am–ը գրում է.
Դելֆինի հետ զույգի դաժան լուսանկարները համացանցի օգտատերերի զայրույթն են առաջացրել, գրում է The Daily Mail-ը: Լուսանկարներից մեկում երևում է, թե ինչպես է կինը հեծնում կենդանուն, իսկ մեկ այլ լուսանկարում տղամարդը նրան բռնել է ու կախել պոչից:
Այժմ մարդիկ կոչ են անում պատասխանատվության ենթարկել պերուացի զույգին իրենց պահվածքի համար:
Համացանցում լուսանկարները տարածվում են հետևյալ հաղորդագրությամբ. «Շարունակե՛ք տարածել այս լուսանկարները, մինչև մենք չպարզենք այս խեղճ դելֆինին սպանած հիմարների ինքնությունը: Զանգահարե՛ք ոստիկանություն, եթե գիտեք՝ ովքեր են նրանք: Նրանք կենդանասպաննե՛ր են: Եկե՛ք պարզենք նրանց ինքնությունը և նրանց ուղարկենք բանտ»:
Լուսանկարները, որոնք հավանաբար արվել են Լիմայում, առաջին անգամ հայտնվել են Reddit կայքում 2014 թվականի մարտին և տարածվելով՝ մեծ աղմուկ բարձրացրել։
Հայտնի չէ, թե արդյոք դելֆինը կենդանի է մնացել կամ արդյոք տեղի իշխանությունները որևէ քայլ են ձեռնարկել: Կենդանիների պաշտպանությամբ զբաղվող խմբերը ցանկանում են, որ ինչ-որ քայլ ձեռնարկվի, իսկ միջադեպը՝ հետաքննվի: