Araratnews.am-ը գրում է.
Այսօր Tumo կենտրոնում Տիգրան Մանսուրյանի, Տիգրան Համասյանի, Սերժ Թանկյանի, Լիլիթ Պիպոյանի և Արթուր Ավանեսովի մասնակցությամբ երաժշտական համաժողովի ներկա էր նաև «Վիտամին» հումորային հաղորդաշարի Գարիկը, ով անդրադառնալով Մանսուրյանի այն տեսակետին, որ պետք է գործի մի ինստիտուտ, որտեղ կլինեն բոլոր երաժշտությունների ներկայացուցիչներ, ասաց.
«Կան երաժշտության տեսակներ, որոնք կոնկրետ մարդու տեսակ են դաստիարակում հասարակության մեջ և դառնում մարդկության մի տեսակ: Ես կարծում եմ, որ կա երաժշտության տեսակ, որը չպետք է լինի այն ինստիտուտում, որտեղ կա ձեր երաժշտությունը: Ձեր երաժշտությունն այնպիսի մոլեկուլներ է կարողանում ճնշել, ինչը ուրիշ ոչ մեկին չի հաջողվում անել»,-նշեց Գարիկը:
Անդրադառանալով համերգինˋ Գարիկը նախ շնորհակալություն հայտնեց խմբին, ապա ասաց, որ միայն System of a Down -ի համերգին կարելի էր տեսնել հասարակության մի զանգված, որն այդքան իրար կպնելուց և երբեմն էլ հրմշտելուց հետո շարունակում էր միասին միասին պարել և ուրախանալ. «Սա մարդկանց տեսակ է, որը դուք եք դաստիարակել: Ես չգիտեի, որ մեզանում նման մարդկանց խումբ կա: Ես սկսել եմ լսել ձեր երաժշտությունը 12-13 տարի առաջ: Ես չեմ ուզում, որ իմ տեսակը հասարակության մեջ քչանա»,-նշեց Գարիկըˋ հավելելով, որ ինքը միշտ երազել է շփվել վերը նշված գործիչների հետ:
Այս ամենին ի պատասխանˋ Սերժ Թանկյանը ժպիտով պատասխանեց. «Դուք սիրաշահեցիք ինձ. ես ձեզ հետ կշփվեմ»: